नेपाल पहिलो पटक ब्लाइण्ड टी–२० विश्वकपको सेमिफाइनलमा प्रवेश

खेलकुद

काठमाडौं । नेपाली दृष्टिविहिन क्रिकेट टोली पहिलो पटक ब्लाइण्ड क्रिकेट टी–२० विश्वकपको सेमिफाइनलमा प्रवेश गरेको छ ।

पाकिस्तानमा भइरहेको चौथो संस्करणको ब्लाइण्ड क्रिकेट टी–२० विश्वकपको सेमिफाइनलमा पुग्दै नेपाली टोलीले इतिहास रचेको हो ।

यसअघि तीन संस्करणकै ब्लाइण्ड क्रिकेटको टी–२० विश्वकप खेलेको नेपाल सेमिफाइनल पुग्न सकेको थिएन । यस पटक शीर्ष चारमा रहँदै सेमिफाइनल पुगेपछि नेपाली ब्लाइण्ड क्रिकेट टोली निकै उत्साहित बनेको छ ।

शनिबार लिग चरणका खेल सकिएपछि नेपाल चौथो स्थानमा रहने पक्का भएको हो । सुरुमा ७ टोलीको सहभागिता रहने भनिएपनि भारत अन्तिम समयमा पाकिस्तान नगएपछि ६ टोलीले ब्लाइण्ड क्रिकेट टी–२० विश्वकप खेले । जसमा नेपालले २ खेल जित्दा ३ खेलमा पराजित भएको थियो ।

श्रीलंका र बंगलादेशसँग पराजित भएको नेपाल त्यसपछि अफगानिस्तान र दक्षिण अफ्रिकालाई पराजित गर्दै सेमिफाइनल पुग्ने सम्भावना बलियो बनाएको थियो ।

अन्तिम खेलमा बलियो टोली आयोजक पाकिस्तानसँग पनि नेपाल पराजित भयो । भारत सहभागी नभएपछि उसको सबै विपक्षीले वाकओभर पाउँदै २ अंक जोडे । जसले गर्दा नेपालले ६ खेलबाट ६ अंक जोड्दै चौथो भएको हो ।

उक्त प्रतियोगितामा नेपालले पहिलो पटक सन् २०१२ मा सहभागिता जनाएको थियो ।