चीन भूकम्पमा १२६ जनाको मृत्यु, १८८ जना घाइते

विश्व प्रवास

काठमाडौं । चीनको दक्षिण पश्चिमी सिजाङ स्वायत्त क्षेत्रको डिङ्ग्री काउन्टीमा मङ्गलबार बिहान गएको सात म्याग्निच्यूडको भुकम्पमा परेर मृत्यु हुने मानिसको संख्या १२६ पुगेको छ ।

भुकम्पमा परेर अन्य १८८ जना घाइते भएका छन् । करिव ३ हजार घरमा क्षति पुगेको छ । भूकम्प गएपछि तिब्बतको शिगात्से शहरमा सयौँ भवनहरू भत्किएका छन् । सो क्षेत्रमा विद्युत् र जल वितरण प्रणाली अवरुद्ध भएको छ ।

भूकम्प प्रभावित क्षेत्रमा तीन हजार चार सय भन्दा बढी उद्धारकर्ता र तीन सय ४० भन्दा बढी स्वास्थ्यकर्मी पठाइएको बी.बी.सी. ले जनाएको छ । चिनियाँ सेनाले उद्धार प्रयास शुुरु गरेको र मानव रहित ड्रोनलाई सगरमाथा नजिकै अवस्थित दुर्गम क्षेत्रमा परिचालित गरेको जनाएको छ ।

चिनिया सञ्चार मध्यमले उद्धारकर्ताहरूले भग्नावशेषमा खोजी गरिरहेको र प्रभावित मानिसहरूलाई कठ्याङ्ग्रिने जाडो बाट जोगिन कम्बल वितरण गरेको दृश्य प्रशारण गरेका छन् । चिनियाँ राष्ट्रपति सी जिनपिङले क्षति कम गर्नका लागि पूर्ण स्तरको खोज र उद्धार प्रयास अनि प्रभावितहरूको पुनर्वासका लागि आह्वान गरेका छन् ।

चिनिया समय अनुसार मंगलबार बिहान ९ बजेर पाँच मिनेटमा सगाजे शहरको डिङ्ग्री काउन्टीको त्सोगो टाउनशिप केन्द्र भएर भुकम्प गएको हो । नेपाल–चीन सीमामा अवस्थित सगरमाथा क्षेत्र नजिकै केन्द्रबिन्दु बनाएर गएको भूकम्पछि कैयौँ परकम्पहरू मापन भएका छन ।

भूकम्पको केन्द्रविन्दुको २० किलोमिटरको दायरा भित्र २७ गाउँ र करिब ६ हजार ९ सय मानिसको बसोबास रहेको समाचारमा उल्लेख छ ।