लोकतान्त्रिक पद्धतीबाट प्रधानमन्त्री बन्न पूर्वराजालाई गौतमको सुझाव

राजनीति

काठमाडौं । राष्ट्रिय सभा सदस्य वामदेव गौतमले पूर्वराजा ज्ञानेन्द्र शाहलाई पुनः राजा बन्ने चाहना त्यागेर लोकतान्त्रिक राजनीतिमा प्रवेश गर्न सुझाव दिएका छन्।

आइतबार राष्ट्रिय सभाको बैठकमा बोल्दै गौतमले राजनीतिक दलका नेताहरूले देशको समुचित विकास गर्न नसकेको गुनासो गर्दै पूर्वराजालाई नयाँ विकल्प अपनाउन आग्रह गरेका हुन्।

गौतमले भने, “राजनीतिक नेताहरू असफल भए भन्दै पुनः राजा बन्ने चाहनु उचित हुँदैन। बरु आफ्नो नेतृत्वमा प्रजातान्त्रिक राजनीतिक दल खोली निर्वाचन आयोगमा दर्ता गरेर २०८४ को निर्वाचनमा भाग लिनुस्। निर्वाचित भई संसदबाट प्रधानमन्त्री बनेर देशको समृद्धि कायम गर्नुस्।”

उनले राजा महेन्द्रको हत्या र राजा वीरेन्द्रको वंश विनाशमा राजपरिवारकै व्यक्तिहरू संलग्न भएको दाबी गर्दै, ज्ञानेन्द्र शाहलाई लोकतान्त्रिक प्रक्रिया अपनाएर नेपाललाई समृद्ध बनाउने जिम्मेवारी लिन चुनौती दिए।

गौतमका अनुसार राजा वीरेन्द्रको हत्यापछि ज्ञानेन्द्र शाहलाई सबै राजनीतिक दलले स्वीकार गरेका थिए । उनले भने “अब यदि देश परिवर्तन गर्न चाहनुहुन्छ भने लोकतान्त्रिक बाटो रोज्नुहोस्, संसदमार्फत प्रधानमन्त्री बन्नुस् र विकासको मार्ग प्रशस्त गर्नुस्।”