कुवेतसँगको हारले नेपालको वरीयता खस्कियो

breaking news

काठमाडौं । हङकङमा यही साता सम्पन्न चारदेश सम्मिलित टी–२० आई प्रतियोगितामा फाइनलमा कुवेतसँग पराजित भएर स्वदेश फिर्ता भएको नेपाली टोलीको क्रिकेट वरीयता खस्किएको छ ।

प्रतियोगितामा उत्कृष्ट सुरुवात गरे पनि फाइनलमा आफूभन्दा पछिल्लो वरीयतामा रहेको टोलीसँग हारेको नेपाललको आई वरीयतामा एक स्थान खस्किदै १८ औं स्थानमा ओर्लिएको हो। उक्त खेलमा नेपाल कुवेतसँग ३ रनले पराजित भएको थियो ।

नेपालको उक्त हारले प्रतियोगितामा टी–२० वरीयतामा पहिलो नम्बरमा रहेका अलराउण्डर दिपेन्द्रसिंह ऐरीको पनि आईसीसी टी–२०आई अलराउण्डर वरीयतामा दोस्रोबाट तेस्रोमा झरेका छन् ।

हङकङ शृंखलामा राम्रो प्रदर्शन गर्दै उनी शीर्षमा पुग्ने धेरैको अपेक्षाविपरीत उनको वरीयता खस्किएको हो । उनी अब तेस्रोमा इंग्ल्याण्डका लियाम लिभिङस्टोनसँग समान २०९ रेटिङका साथ छन् ।

दीपेन्द्र खस्किंदा अस्ट्रेलियाका मार्कस स्टोइनिस दोस्रोमा उक्लिएका छन् भने भारतका हार्दिक पाण्ड्या शीर्षमा यथावत् छन् । दीपेन्द्रको रेटिङ २३३ बाट २०९ मा झरेको हो । शीर्षका पाणड्याको २५२ तथा दोस्रोका स्टोइनिसको २१० रेटिङ छ ।

दीपेन्द्रले हङकङमा भएका खेलमा कतारसँग ब्याटिङ गर्नुपरेन भने बलिङमा ४ ओभरमा २६ रन दिंदा कुनै विकेट लिएनन् । कुवेतसँग १२ बलमा ३१ रन बनाउँदा हङकङसँग वर्षाले प्रभावित खेलमा ब्याटिङ बलिङ दुवै गरेनन् । कुवेतसँगको फाइनलमा भने उनी डकआउट भएका थिए । बलिङमा पनि एक ओभर गर्दा विकेट लिएनन् ।