आईसीसी लिग–२ः आज नेपालले पहिलो खेल स्कटल्यान्डसँग खेल्दै !

Breaking News

- न्यूज नेपाल

काठमाडौं । आजबाट नेपालले आईसीसी विश्वकप लिग–२ अन्तर्गतको नयाँ श्रृङ्खलाको पहिलो खेल स्कटल्याण्डसँग खेल्दैछ । नेपाल, नेदरल्याण्ड्स र स्कटल्याण्ड सहितको त्रिकोणात्मक सिरिजअन्तर्गत नेपालले घरेलु टोलीसँग पहिलो खेल खेल्न लागेको हो ।

नेपालले करिब ७ महिनापछि ओडिआई खेल खेल्न लागेका हो । यसअघि नेपालले सन्२०२४ मा स्कटल्याण्डसँग नै ओडिआई खेल खेलेको थियो । उक्त खेल नतिजाविहीन बनेको थियो । सन् २०२४ को नोभेम्बरमा भएको नेपाल, अमेरिका र स्कटल्याण्डबिचको त्रिकोणात्मक सिरिजअन्तर्गतको उक्त खेलमा दुवै टोलीले एक–एक अंक बाँडेका थिए । त्यसयता नेपालले कुनै पनि ओडिआई खेल खेलेको छैन ।

यो सिरिजमा नेपालले ४ खेल खेल्नेछ । अंक तालिकाको पुछारमा रहेको नेपाललाई यो सिरिज निकै महत्वपूर्ण हुनेछ । दुवै टोली आईसीसीको ओडिआई वरियतामा माथि हुँदा आफ्नो पक्षमा नतिजा निकाल्न नेपाललाई चुनौती हुनेछ । यस्तै राम्रो नतिजा निकाल्दै अंकतालिकाको पुछारबाट उक्लिने अवसर पनि नेपाललाई हुनेछ ।

नेपाल १७ औं स्थानमा रहँदा स्कटल्याण्ड १३ औं र नेदरल्याण्ड्स १४औं स्थानमा छन् । लिग–२ मा पनि उत्कृष्ट प्रदर्शन गरिरहेका छन् यी दुई टोलीले । २० खेल खेलेको नेदरल्याण्ड्स १२ जितसहित दोस्रो स्थानमा छ । १६ खेलबाट ९ जित निकालेको स्कटल्याण्ड २० अंकसहित चौथो स्थानमा छ । १२ खेलमा मात्र २ खेलमा जित निकालेको नेपाल ६ अंकसहित अंकतालिकाको पुछारमा छ ।

आजको खेल नेपाली समय अनुसार दिउँसो पौनै ४ बजेबाट सुरु हुनेछ ।