बिपी राजमार्ग अस्थायी ट्रयाक निर्माण गरी सञ्चालनमा !

Breaking News

- न्युज नेपाल

काठमाडाैं । यही असोज १७ र १८ गतेको अविरल वर्षासँगै आएको बाढीपहिरोपछि पूर्णरुपमा अवरुद्ध भएको बिपी राजमार्ग सञ्चालनमा भएको छ ।

जिल्ला ट्राफिक प्रहरी कार्यालयका प्रमुख प्रहरी निरीक्षक सुनिल धाँजुले हिजा (शुक्रबार) दिउँसोसम्म अवरुद्ध भएको बिपी राजमार्गको सबै स्थानमा अस्थायी ट्रयाक निर्माणको काम सम्पन्न भई सवारी साधन सञ्चालनमा आएकेा जानकारी दिनुभयेा ।

उहाँले अवरुद्ध राजमार्ग राजमार्गको काभ्रे र सिन्धुलीको विभिन्न १३ ठाउँमा क्षति पुगेको करिब ४ किलोमिटर सडकलाई अस्थायी रूपमा मर्मत गरी एकतर्फी रूपमा सञ्चालन आएकेा जानकारी दिनुभयेा।

बाढीपहिरोले काभ्रेको चौकीडाँडामा सडकलाई सबैभन्दा बढी क्षति पुर्‍याएको थियो ।

काभ्रेको कटुन्जे, चारसयबेंसी, चिउरीबास, मङ्गलटार (बोक्सीकुना), कालढुङ्गा, पिप्ले (माथिल्लो), पिप्ले (तल्लो), मान्ती (माथिल्लो) र मान्ती (तल्लो)मा सडक क्षति पुगेको थियो ।

यसैगरी, सिन्धुलीको बालुवा, आँपघारी र नेपालथोक (झोलुङ्गे पुल)मा सडक क्षति पुगेको थियो । राजमार्ग सुचारु भएको भए पनि अझै ठाउँ ठाउँमा रोलिङ र ग्रेडिङ मिलाउने कार्य भैरहेकोले यातायात केहि असहज हुने सडक विभागले जनाएको छ ।