‘लागूऔषध दुर्व्यसन’ विरुद्द सचेतनाका लागि वक्तृत्वकला प्रतियोगिता सम्पन्न

कोशी प्रदेश

गाईघाट । जिल्ला प्रहरी कार्यालय उदयपुरको आयोजना तथा त्रियुगा नगरपालिकाको सहकार्यमा “लागू औषध मुक्त समाज निर्माणमा विद्यार्थीको भूमिका” विषयक नगर स्तरीय वक्तृत्वकला प्रतियोगिता सम्पन्न भएको छ । समुदाय प्रहरी साझेदारी अवधारणानुसार लागूऔषध दुर्व्यसन विरुद्द जनचेतना अभिवृद्दि गर्ने उद्देश्यले यही पौष ७ गते आईतबार जिल्ला समन्वय समिति उदयपुर गाइघाटको सभाहलमा वक्तत्वकला सम्पन्न भएको हो । नगर क्षेत्रका विभिन्न विद्यालयमा कक्षा ९ र १० मा अध्ययनरत विद्यार्थीहरुले वतृत्वकलामा सहभागिता जनाएका थिए ।

जिल्ला प्रहरी कार्यालय उदयपुरका प्रमुख प्रहरी उपरीक्षक हरिहर नाथ योगीले अध्यक्षता गर्नु भएको कार्यक्रममा त्रियुगा नगरपालिका उपप्रमुख महेश्वरी राईको प्रमुख आतिथ्य र उदयपुर जिल्लाका प्रमुख जिल्ला अधिकारी हरि प्रसाद घिमिरेको विशेष आतिथ्य रहेको थियो ।

प्रतियोगितामा त्रियुगा नगरपालिका स्थित १३ वटा सामुदायिक तथा निजी विद्यालयका विद्यार्थीहरुको सहभागिता थियो । उक्त प्रतियोगितामा क्यान्भास सेकेण्डरी बोर्डिङ स्कुल कक्षा ९ मा अध्ययनरत् छात्रा जेनिशा कार्कीले प्रथम स्थान, राष्ट्रिय मा.वि. बगाहामा कक्षा १० मा अध्ययनरत छात्रा नम्रता दाहालले द्वितीय स्थान र वालमन्दिर मा.वि. वोक्सेमा कक्षा १० मा अध्ययनरत मनिषा चौधरीले तृतीय स्थान हासिल गर्नुभयो । प्रमुख अतिथि महेश्वरी राईले विजेता विद्यार्थीहरुलाई प्रमाणपत्र र नगद पुरस्कार प्रदान गर्नु भएको थियो ।

कार्यक्रममा जिल्ला सुरक्षा समितिका पदाधिकारीहरु, त्रियुगा नगरपालिका वडा नं ११ र १२ का वडा अध्यक्षहरु, नेपाल पत्रकार महासंघ उदयपुरका अध्यक्ष एवं सञ्चारकर्मीहरु, विभिन्न विद्यालयका शिक्षकहरु, सामाजिक अभियन्ता, विद्यार्थीहरु लगायत १५० जनाको उपस्थिति रहेको थियो ।