राष्ट्रपतिलाई जथाभावी गाली गर्ने सुनारलाई कारवाहीको लागि काठमाडौं झिकाईयो

समाचार

काठमाडौं, ३० असार । राष्ट्रपति विद्यादेबी भण्डारीविरुद्ध जथाभावी लेखेको आरोपमा पक्राउ गरेका सोनुकुमार सुनारलाई काठमाडौं झिकाईएको छ । राष्ट्रपतिको लागी गाडी खरिद प्रकरणसंग जोडेर सामाजिक सञ्जाल फेसबुकमा अपमानजनक स्टाटस लेखेको आरोपमा कपिलवस्तु प्रहरीले पक्राउ गरेको थियो ।

पेशाले पत्रकार रहेका सुनारलाई केन्द्रको निर्देशन अनुसार जिल्ला प्रहरी कार्यलय कपिलवस्तुले साइवर अपराधको कानुनी कारवाहीका लागि काठमाडौँ पठाएको हो । सुनारले विभिन्न मितिमा राष्ट्रपति ,प्रधानमन्त्री देखि ठुलापार्टीका नेताहरुका विषयमा लेखेका आपत्तिजनक तुच्छ स्टाटसबाट उनले साइवर अपराध निरन्तर गर्दै आएको पाइएकोले काठमाडौं चलान गरिएको प्रहरी उपरिक्षक भोजजंग शाहले जानकारी दिए ।

यता कपिवस्तुका प्रमुख जिल्ला अधिकारी विष्णुप्रसाद ढकालले भने साइवर अपराधका विषयमा पहिलोपटक कपिलवस्तुबाट अनुसन्धान शुरु भएको बताए । उनले यस्ता गतिविधिमा संलग्नहरुका बारेमा समयमै प्रशासनलाई जानकारी दिन आग्रह गरेका छन् । पक्राउ परेका सुनारमाथि कडा कारवाहीको माग गर्दै कपिलवस्तुका अधिकारकर्मीहरुले जिल्ला प्रशासन कार्यालय कपिलवस्तुमा ज्ञापन पत्र बुझाएका छन् ।

पक्राउ परेका सुनार कपिलवस्तु सदरमुकाम तौलिहवाको रेडियोका प्राविधिक हुन् । उनले आफुलाई सो रेडियोको स्टेशन मेनेजर भनेर फेसबुकमा स्वघोषित रुपमा लेखका थिए । उनले सामाजिक संजालमा राष्ट्रपति भण्डारी विरुद्ध निकै अपमानित शब्द प्रयोग गरेर गालीगलौज गरेका थिए । राष्ट्रपति भण्डारीका लागि खरिद गरिन लागेको नयाँ गाडी प्रकरणमा उनले तुच्छ भाषाको प्रयोग गरेका थिए ।