टेरेसाको मृत्यु भएको दिन आज

रोचक

- न्युज नेपाल

काठमाडौं। सन् १९९७ मा आजकै दिन ५ सेप्टेम्बर मदर टेरेसाको मृत्यु भएको थियो ।

टेरेसालाई भारतका गरिबहरुलाई गरेको अतीव सेवाका कारण संसारभर सम्मान गरिन्छ । टेरेसाले महिला सेविकाहरुको ठूलो जमात बनाएकी थिइन् ।

उनले सन् १९५० मा स्थापना गरेको संस्था ‘ मिसनरिज अफ च्यारिटी ले विभिन्न सेवागृह चलाएको अवस्था थियो’ । मानव सेवामा सर्मपित भएका कारण उनले १९७९ को नोबेल शान्ति पुरस्कार समेत जितेकी थिईन । यद्यपि उनको संस्थाले सञ्चालन गरेका अस्पतालमा सफाइ स्तर नभएको कतिपयको दाबी थियो । त्यसका साथै तानाशाहहरुले दिएको दान स्विकार गरेको भन्दै उनको आलोचना समेत हुने गरेको थियो । तर ति सबै कुरालाई ख्याल नगरि उनले ४५ वर्षसम्म गरीब, बिरामी, अनाथ, र मर्न लागेका मानिसहरूको मद्दत गरिन।

टेरेसा १९१० अगस्ट मा मेसेडोनियामा जन्मिएकी थिइन् । १९ वर्षको उमेरमा समाज सेवामा होमिएकी उनी तत्काल भारत सरुवा भइन् । उनले दार्जिलिङको एक स्कुलमा समेत पढाएकी थिईन । सन् १९४६ मा कोलकता फर्केर उनले दुः खी, गरिबको सेवा गर्न थालिन् । त्यसको एक दशकपछि अस्पतालका साथै परित्यक्त बालबालिकाको लागि आश्रय गृह चलाएकी थिईन् ।

मदर टेरेसालाई उनको सेवा कार्यको सम्मान गर्दै धेरै प्रकारका पुरस्कार र सम्मानहरु प्रदान गरिएको छ । सन् १९७९ डिसेम्बर १९ मा मदर टेरेसालाई उनको सामाजिक र मानब कल्याण कार्यलाई कदर गर्दै नोबेल शान्ति पुरस्कार ले सम्मान, सन् १९६२ मा मदर टेरेसालाई उनको सामाजिक कार्यलाई कदर गर्दै भारत सरकारले पद्मम श्री पुरस्कारबाट सम्मान गरेको थियो ।

“तिमी कति काम गर्छौ यो सफलताको लागि महत्त्वपुर्ण कुरा हुँदै हैन,तिमी आफ्नो कामलाई कति प्रेमपुर्ण गर्छौ यही सफलताको मापदण्ड हो।”–मदर टेरेसा