श्रीमतीको सफलताका लागि योगेश भट्टराईले बलि चढाए मन्त्री पद !

बागमती प्रदेश

- न्युज-नेपाल

काठमाडाैं । नेकपाका प्रभावशाली नेता तथा प्रतिनिधिसभा सदस्य योगेश भट्टराईले श्रीमतीलाई नर्सिङ परिषदमा रजिष्ट्रार बनाएको पाइएको छ ।

नर्सिङ कलेजहरुको नियमन गर्ने निकाय नेपाल नर्सिङ परिषदमा भट्टराईकी श्रीमती बिन्दा घिमिरे छ महिनाअघि परिषदको रजिष्ट्रार बनेकी हुन् ।

चिकित्सा शिक्षाका विकृतिका बारेमा आन्दोलन तथा अनशनका श्रृङखला चलिरहेका बेला नेकपाका प्रभावशाली नेताहरु भने आफ्ना नातेदारहरुलाई विभिन्न स्थानमा सेटल गराउन लागि परेको तथ्य फेला परेको छ ।

योगेश भट्टराईलाई प्रधानमन्त्री केपी शर्मा ओलीले उनको निर्वाचन क्षेत्रमा चुनावी सभालाई सम्बोधन गर्दै मन्त्री बनाउने घोषणा समेत गरेका थिए । तर, उनलाई मन्त्री नबनाएपनि उनकी श्रीमतीलाई सुरक्षित स्थानमा लगेर राखेकै कारण नेता भट्टराई चुप बसेको स्रोतको दावी छ ।

सिटिइभिटी कार्यक्रममा सबैभन्दा बढी विकृति मौलाएको र अहिले जनचासो बढेर गएको कार्यक्रममा नर्सिङ पर्ने गरेको विज्ञहरुकलो भनाई छ । २०७१ सालमा खगराज अधिकारीको पालामा परिषद सदस्यमा नियुक्ति खाएकी घिमिरे अन्ततः रजिष्ट्रार बन्न सफल भएकी हुन् ।

परिषदमा पन्ध्र सदस्यीय बोर्ड गठन हुने गरेको छ। यो सबै राजनीतिक नियुक्ति हो। परिषदमा अध्यक्ष, उपाध्यक्ष, विज्ञ नर्स, नर्सिङ डाइरेक्टर, रजिष्ट्रार, उपभोक्ता मञ्चबाट, क्याम्पस प्रमुखबाट दुई जना, नर्सिङ संघ अध्यक्ष पदेन सदस्य, सदस्यमध्येबाट चुनाव गरेर तीन जना, सिटिइभिटीबाट एक जना, क्षेत्रीयबाट एक जना र स्वास्थ्य सेवा विभागबाट नियुक्ति हुने व्यवस्था छ ।

भट्टराईकी श्रीमती स्वास्थ्य सेवा विभागका महानिर्देशकको सिफारिसमा चार वर्षअघि परिषद सदस्य बनेकी थिइन् । यो कार्यकाल नसकिँदै उनी छ महिना अघि रजिष्ट्रार नियुक्त भएकी हुन्। ‍परिषद भन्दाअघि उनी त्रिवि शिक्षण अस्पतालमा नर्स थिइन् ।

परिषद विश्वविद्यालय तथा सिटिइभिटीका नर्सिङ कलेजको कार्यक्रमको सिट निर्धारण गर्ने संस्था हो । यही परिषद मातहत सिटिइभिटीका १८९ कलेज छन् ।