मेलम्ची खानेपानी आयोजनामा कोरोनाको असर छैन

बागमती प्रदेश

- न्युज-नेपाल

काठमाडाैँ । काठमाडौँ उपत्यकाको खानेपानी समस्या समाधानका रुपमा रहेको मेलम्ची खानेपानी आयोजनामा नोबेल कोरोना भाइरस ‘कोभिड–१९’ ले असर नपुर्‍याएको पाइएको छ।

राष्ट्रिय गौरवको आयोजनाका रुपमा रहेको सो आयोजनामा निर्माणको काम थोरै मात्रै बाँकी छ।

आयोजनाको बाँकी काम अहिले चिनियाँ निर्माण कम्पनी ‘सिनो हाइड्रो’ ले गरिरहेको छ। आयोजनामा कार्यरत दुई तीन जना मात्रै अहिले चीन गएका छन्। उनीहरु नहुँदा पनि अहिले काममा कुनै अवरोध नपुगेको आयोजनाका वरिष्ठ डिभिजनल इञ्जिनियर कमलराज श्रेष्ठले बताए।

श्रेष्ठका अनुसार नयाँ वर्ष मनाउन चीन गएका उनीहरु त्यसपछि फर्किएका छैनन्। चीन गएकामध्ये एक जना परियोजना व्यवस्थापक र एक जना प्रबन्ध सहयोगी (लजिस्टिक सपोर्टर) रहेका छन्। उनीहरु केही समयमा फर्किने कम्पनीले जानकारी दिएको छ।

‘अहिले त्यहाँ भएका जनशक्ति नियमित रुपमा काम गरिरहेका पाइएको छ,’ उनले भने।

सरकारले आगामी असारसम्ममा काठमाडौँमा पानी झार्ने प्रतिबद्धता जनाएकामा त्यहीँअनुसार निर्माणको काम अघि बढिरहेको वरिष्ठ डिभिजनल इञ्जिनियर श्रेष्ठले बताए।

दक्ष र अदक्ष गरी झण्डै ५० चिनियाँ जनशक्ति निर्माणस्थलमा कार्यरत छन्। झण्डै दुई सय नेपाली कामदार कार्यरत छन्। तीमध्ये थोरै मात्रै दक्ष जनशक्ति छन् भने अधिकांश अदक्ष कामदार छन्।

कम्पनीले गत दुई महिना दैनिक अतिरिक्त समय काम लगाएर र अरु योजनामा कार्यरत जनशक्ति थप गरेर समयमै सम्पन्न गर्न लागेको छ।