मेलम्चीको निर्माणमा त्रुटीका कारण सुरुङ मार्ग फुट्यो, हराएका दुई कर्मचारी अझै फेला परेनन्

बागमती प्रदेश

- न्युज-नेपाल

काठमाडौं । मेलम्ची खानेपानी आयोजनाको सुरुङको ढोका गलत तरिकाले बनाइँदा ढोका फुटेको आयोजनाका कर्मचारीले बताएका छन् ।

मेलम्ची खानेपानी आयोजनाले एक साता पहिलेदेखि सुरुङ परीक्षण गरिरहेका बेलामा हिजो दिउँसो एउटा ढोका फुट्दा पानीले बगाएर दुई जना कर्मचारी हराइरहेका छन् ।

आयोजनाको सुरुङको ढोका फुट्दा इन्जिनियर सतिश गोहित र चालक राधाकृष्ण थापा मगर बेपत्ता भएका छन् । उनीहरुको खोजी जारी भए पनि पत्ता लाग्‍न सकेको छैन । घाइते भएका कन्सल्ट्यान्ट दोर्जे पेम्बा र इञ्जिनियर शेखर खनालको उपचार भइरहेको छ ।

आयोजनाका एक इन्जिनियरका अनुसार सुरुङमा गलत तरिकाले ढोका बनाइँदा घटना भएको हो । ढोका भित्रबाट खोल्ने बनाउनुपर्नेमा बाहिरबाट खोल्न मिल्ने बनाइएको र सोही कारण घटना भएको उनले दाबी गरे । “बाहिरबाट ढोका खोल्ने बताउँदा पानीको बहावका कारण ढोकाको नटमा असर पार्छ, धेरै समयसम्म पानीको चापले हानेपछि ढोका फुट्छ भनेर पहिले पनि भनेका थियौं” उनले भने, “तर हाम्रो कुरै सुनिएन ।”