सुशासन, विकास र समृद्धि कायम गर्न शासकसँग निष्ठा र इमान्दारिता हुनुपर्छ: पूर्वप्रधानन्यायाधीश कार्की

काठमाडौं । पूर्वप्रधानन्यायाधीश सुशीला कार्कीले देशमा सुशासन, विकास र समृद्धि कायम गर्न शासनमा रहका नेताहरुसँग इमान्दारिता र निष्ठा हुनुपर्नेमा जोेड दिएकी छन् । काठमाडौंमा बिहीबार ‘हिमालय मातृभूमी फाउण्डेशन’ नामक गैरसरकारी संस्थाको उद्घाटन गर्दै उनले उक्त कुरा बताएकी हुन् । तर सत्तामा रहेका नेताहरुले मलाई जनताले के भन्लान् भन्ने कुराको हेक्कै नराखि मनलागी गरिरहेको उनले दाबी गरिन् ।

पूर्वप्रधानन्यायाधीश कार्कीले सत्तामा रहेका नेताहरुप्रति लक्षित गर्दै भनिन्, ‘वर्तमानमा नेताहरुलाई गलाभरि माला लगाउन पाए भयो, १० वटा -२० वटा माला घाँटीमा लगाएर देखायो, त्यति भए पुग्छ ।’ सत्तामा रहेका व्यक्तिहरुले इतिहासमा मेरो मुल्यांकन कस्तो होला, म के हुँला, जनताले कसरी मुल्यांकन गर्लान् भन्ने कुराको हेक्का नराख्ने गरेको उनले जनाइन् ।

देशको राजनीतिक अवस्था देखेर आफूलाई विरक्त लागेको उनले जनाइन् । देशको राजनीतिसम्बन्धी समाचार नसुन्ने गरेको पूर्वप्रधानन्यायाधीश कार्कीले जनाइन् । कहिले बालुवाटार कान्ड, कहिले सुन कान्डलगायत देशमा कान्डैकान्डबाहेक केही नभएको उनले जनाइन् ।

सत्तामा बसेकाहरु आफैं हाँस्ने र नाँच्ने गरेको कार्कीको भनाइ थियो । उनले जनतालाई दुःख भइरहेको तर नेताहरु आफूखुसी रमाएर आनन्द मानिरहेको पनि जनाइन् । प्रवुद्ध वर्गले शासनशैलीप्रति आलोचना गरिरहँदा नेताहरु भने आफ्नो प्रशंसा आफैं गरिरहेको जनाइन् ।

पूर्वप्रधानन्यायाधीश कार्कीले भनिन्, ‘नेताहरुले मुखमा आएजति बोलेको पनि सुनिन्छ, सरापेको पनि सुनिन्छ । मैले सबैभन्दा राम्रो काम गरेको छु भनेर आफैं भनेको पनि सुनिन्छ । यता जनता भने शासकहरुको कामकारबाहीप्रति असंतुष्ट छन् ।’ यस्तो विषम परिस्थितिका विचमा कसरी समायोजन गर्ने भन्ने प्रमुख समस्या आफूले देखेको उनले जनाइन् । जनताले विरोध गर्दा पनि नेताहरु एकोहोरो लागेको उनले जनाइन् । राजनीतिमा अधिकांश जनताहरु जानकार भएको जनाउँदै उनले अभाव भने विकासको भएको दाबी गरिन् ।

हिमालय मातृभूमी फाउण्डेशनको ‘सुशासन, विकास र समृद्धिका लागि राष्ट्रिय अभियान २०८०’ विषयक अवधारणा-पत्रमा केन्द्रित हुँदै उनले अवधारणा-पत्रमा आफूले विमति जनाउनुपर्ने केही पनि विषय नभएको जनाइन् । उनले अवधारणा-पत्रमा उल्लेख भएका विषयहरु देशको अवस्थासँग मिल्दो भएकाले सुशासन, विकास र समृद्धिका लागि संस्थाले काम गर्नेमा आफू विश्वस्त रहेको जनाइन् ।

फाउण्डेशनका अध्यक्ष टीकाराम पुरीको अध्यक्षतामा भएको कार्यक्रममा नेपाल सरकारका पूर्वसचिव सागरप्रसाद धिताल, पूर्वराजदूत महेश दाहाल, पत्रकार महासंघका अध्यक्ष विपुल पोखरेल, प्याब्सनका अध्यक्ष डीके ढुंगाना, एन प्याब्सनका सहअध्यक्ष सुवास न्यौपाने, राजनीतिक विश्लेषक मुमाराम खनाल, दिनेश सुवेदीलगायतले धारणा राखेका थिए । सुनिल बजगाईले अवधारणापत्र प्रस्तुुत गरेको कार्यक्रमका वक्ताहरुले देशमा सुशासन, विकास र समृद्धि कायम गर्न फाउण्डेशनको अभियानले टेवा पुर्याउने जनाए ।

Comments