अपडेटः नारायणगढ–मुग्लिन सडक खण्डमा पहिरोः एक असईसहित २ जनाको शव भेटियो

समाचार

चितवन, ९ असार । चितवनको डेढकिलोमा खसेको पहिरोल प्रहरी भ्यान खोलामा खस्दा दुई प्रहरीको ज्यान गएको छ । नारायणगढ–मुग्लिन सडकखण्डको इच्छाकामना गाउँपालिका वडा नम्बर ६ डेढकिलोमा गएराति खसेको पहिरोले प्रहरीको भ्यान खोलामा खस्दा दुई प्रहरीको ज्यान गएको हो ।

ज्यान गुमाउनेहरुमा इलाका प्रहरी कार्यालय मुग्लिनका प्रहरी सहायक निरीक्षक निश्चल तामाङ, प्रहरी जवान दीपक कुमार मास्के रहेका छन् । प्रहरी भ्यानमा सवार प्रहरी जवान सन्दीप कार्की र लीलबहादुर चेपाङ भने अझै बेपत्ता भएको जिल्ला प्रहरी कार्यालय चितवनका प्रहरी उपरीक्षक दीपक थापाले जानकारी दिए ।

पहिरोले एउटा ट्रक पनि बगाएको छ । ट्रकका सहयोगी चालकलाई उद्धार गरिएको छ । उनी सकुशल छन् । पहिरोले प्रहरीको ना १ झ १३९० नम्बरको भ्यान र ना ५ ख ७८२७ नम्बरको ट्रक बगाएको थापाले जानकारी दिए । पहिरोसँगै खोलामा खसेको प्रहरी भ्यान देखिएको छैन् । भने त्रिशूली नदीमा ट्रकको केही भाग देखिएको छ । रातिदेखि नै पहिरो पन्छाउने क्रम जारी रहेको छ ।

कालीखोलाको मुखमा राति ९ बजेर ४० मिनेट जाँदा पहिरो खसेपछि प्रहरी पहिरो पन्छाउन पुगेका थिए । फर्कने क्रममा मुग्लिनबाट २ दशमलव ५ किमी नारायणगढतर्फ कालीखोला नपुग्दै एकाएक पहिरो खसेर गाडी पुरिएको प्रहरीले जनाएको छ । जसले गर्दा खोजी गर्न कठिनाई भएको प्रहरीले जनाएको छ । अहिले सडक खण्डमा सयौं गाडीहरु अलपत्र परेका छन् ।