चार पटकको विश्वकप विजेता जर्मनीलाई समूह चरणबाटै दक्षिण कोरियाले गर्यो विदाइ, मेक्सिको र स्विडेन अन्तिम १६ मा

समाचार

काठमाडौं १३, असार । चार पटकको विश्व विजेता तथा डिफेन्डिङ च्याम्पियन जर्मनीलाई दक्षिण कोरियाले स्तब्ध बनाएको छ ।

साथै, जर्मनी विश्वकपको समूह चरणबाटै बाहिरिएको छ ।

मंगलबार राति भएको समूह चरणको अन्तिम खेलमा कोरियाले जर्मनीलाई २-० हराएको हो । दुबै गोल इन्जुरी टाइममा भएको थियो ।
कोरियाका लागि किम यङले ९२ औं मिनेटमा गोल गरे भने सन मिनले ९६ औं मिनेटमा गोल गरे। यो खेलका लागि ९ मिनेट इन्जुरी टाइम थपिएको थियो।

यता स्विडेनले मेक्सिकोलाई ३-० ले पराजित गर्दै समूह विजेता बनेर अन्तिम १६ मा प्रवेश गरेको छ। खेलमा पराजित भए पनि मेक्सिको रनरअप बन्दै प्रि क्वाटर फाइनलमा प्रवेश गरेको छ। स्विडेनले समूह जिको उपविजेतासँग सामना गर्नेछ भने मेक्सिकोले जि को विजेतासँग सामना गर्नेछ।

पहिलो खेलमा मेक्सिकोसँग हारेको जर्मनीले दोस्रो खेलमा स्वीडेनलाई २-१ ले हराएको थियो । समूह चरणको अन्तिम खेल खेल्दै गर्दा दक्षिण कोरिया बाहेक तीनै टिमको सम्भावना थियो ।

तर, जर्मनीका लागि अघिल्लो चरण प्रवेशको सम्भावना कायम गर्न दक्षिण कोरियालाई हराउनै पर्ने थियो । यदि जर्मनीले कोरियालाई हराएको र स्वीडेनले मेक्सिकोलाई ३-० ले जितेको भए गोल अन्तरका आधारमा जर्मनी अघिल्लो चरण पुग्थ्यो भने मेक्सिको बाहिरिने थियो ।

तर, कोरियाले आफू मात्र बाहिरिएन, साविकको विजेतालाई पनि सँगै घर फर्काएको छ । हारका बाबजुद मेक्सिको भने उपविजेता बनेको छ ।