परम्परा तोड्दै कपाल मुण्डन गरेर आमाको किरिया बसिन् सांसद उषाकला राई

समाचार

काठमाडौँ । प्रदेश नम्बर १ की सांसद उषाकला राई कपाल मुण्डन गरेर आमाको किरियामा बसेकी छिन्। उषाकलाकी आमा लक्ष्मी राईको उपचारका क्रममा बुधबार राजधानीको एक अस्पतालमा निधन भएको थियो। हिन्दु परम्पराअनुसार दिवंगत आमाबुवाको किरिया छोराले गर्ने चलन छ। सांसद राई त्यो चलन तोडेर किरिया बसेकी हुन्। उनका दाजुभाइ छैनन्।

सांसद राईका पति पूर्वमन्त्री तथा प्रतिनिधि सभा सदस्य शेरबहादुर तामाङले काजकिरिया गर्ने व्यक्तिलाई किरियापुत्री शब्द प्रयोग गर्ने गरिएको भएपनि छोरा बस्ने प्रचलन रहेको उल्लेख गर्दै उषाकला राईले किरियापुत्री शब्दको वास्तविक अर्थ दिएको उल्लेख गरेका छन्।

तामाङले फेसबुकमा लेखेका छन् -उषाजी तपाईं साच्चै महान् हुनुहुन्छ। महिला र पुरुषलाई लैंगिक हिसाबले गरिएको विभेदको संवैधानिक र कानुनी हिसाबले अधिकांश अन्त्य भएपनि व्यवहारिक हिसाबले अन्त्य गर्न तपाईंहरू जस्तै नारीहरुको अग्रज कदमले योगदान पुग्नेमा हामी विश्वास गर्दछौ । मेरो सधैं तपाईप्रति सम्मान र समर्थन छ।