मुम्बई उड्न लागेको विमान रोकेर प्रहरी समात्यो सुन व्यापारी

अपराध

- न्युज नेपाल

काठमाडाैं । काठमाडाैंबाट मुम्बई उड्नै लागेको नेपाल एयरलाइन्सको विमानलाई रोकेर प्रहरीले सुन व्यवसायमा संलग्न व्यक्तिलाई पक्राउ गरेको छ ।

सुरुमा आतंकावादसंग सम्बन्धित व्यक्ति मुम्बई भाग्न लागेको भन्दै जहाज रोकेको प्रहरीले सुन व्यापारी सन्तोष लामिछाने र उनकी पत्नी मीना लामिछानेलाई पक्राउ गरेको हो ।

सुनचाँदी र उनीहरुले गर्ने अन्य कारोबारमाथि समेत शंका लागेपछि प्रहरीले थप अनुसन्धान अघि बढाएको हो । कैलालीका लामिछानेमाथि यसअघि पनि उजुरी परेको प्रहरी स्रोतले जनाएको छ । उनीमाथि ठगीको कसुरमा जिल्ला प्रहरी कार्यालय कैलालीमा जाहेरी परेको थियो ।

अहिले सुनचाँदी व्यवसायीहरुको टोलीसँग उनी मुम्बई घुम्न जान लागेका थिए । त्यही बेला कैलाली प्रहरीले आतंकवादी संगठनमा रहेका व्यक्ति जहाजमा रहेको भन्द प्रधान कार्यालयमा जानकारी गराएको थियो ।

जहाज उड्न लागेको बेलामा प्रहरीको विशेष ब्युरोले उनीहरुलाई पक्राउ गरेको हो । ढोका बन्द भएर उड्न लागेका बेला सबै यात्रु उतारेर प्रहरीले उनीहरुलाई पक्राउ गरेको हो ।