६० किलो सुन तस्करी प्रकरणबारे छानबिन आयोग गठन प्रक्रियाअघि बढ्यो

Breaking News

- न्युज नेपाल

काठमाडौं । सरकारले सुन तस्करीको छानबिन गर्न उच्चस्तरीय आयोग गठन प्रक्रिया अघि बढाएको छ ।

भदौ ६ गते संसदमा रहेका सात दलबीच भएको सुन तस्करीको छानबिन सम्बन्धी दुई बुँदे आयोग अनुसार छानबिन समिति गठन प्रकृया अगाडी बढाइएको हो ।
। जहाँ सुन तस्करीको छानबिन गर्न आयोग गठन गर्ने उल्लेख छ ।

शुक्रबार बसेको प्रतिनिधि सभाको बैठकलाई सम्बोधन गर्दै प्रधानमन्त्री पुष्पकमल दाहाल प्रचण्डले पूर्वसहमति अनुसार छानबिन आयोग गठन प्रक्रिया अघि बढेको जानकारी गराएका हुन् ।

‘अवैध सुन तस्करीको सम्बन्धमा सीआइबीले अनुसन्धान टुंगाई प्रतिवेदन बुझाइसकेको छ । यसअघि भएको सहमतिअनुसार उच्चस्तरीय छानबिन आयोग बनाउने प्रक्रिया अगाडि बढेको समेत यस सम्मानित सदनलाई जानकारी गराउन चाहन्छु,’ प्रधानमन्त्री प्रचण्डले संसदलाई संबोधन गर्दै भने ।

साउन ३ गते सिनामंगलबाट बरामद भएको साढे ६० किलो सुन तस्करीबारे नेपाल प्रहरीको केन्द्रीय अनुसन्धान ब्यूरो (सीआईबी) अध्ययन गरेर प्रतिवेदन जिल्ला सरकारी वकिलको कार्यालयमा बुझाइसकेको छ ।

राजस्व अनुसन्धान विभागले बरामद गरेको उक्त सुनबारे थप अनुसन्धान गर्ने जिम्मा सीआईबीलाई दिइएको थियो । सीआईबीले अध्ययन सकाएसँगै उच्च स्तरीय छानबिनको प्रक्रिया अगाडि बढेको प्रधानमन्त्री प्रचण्डले संसदलाई जानकारी गराएका हुन् ।

गृहमन्त्री लगायत सरकारका पदाधिकारी संलग्न रहेको र (सीआइबी)ले निष्पक्ष छानबिन गर्न नसक्ने भन्दै संसदको प्रमुख प्रतिपक्ष दल एमालेले छानबिन आयोगको माग राख्दै लामो समय संसद बैठक अवरुद्ध गरेपछि सरकार आयोग गठन गर्न सहमति भएको थियो ।