‘जवान’ले बलिउडका अहिलेसम्मका सबै व्यावसायिक रेकर्ड तोड्यो

कला र साहित्य

- न्युज नेपाल

काठमाडौं । बलिउड अभिनेता शाहरुख खानको पछिल्लो नयाँ फिल्म ‘जवान’ले बलिउडको अहिलेसम्मको सबै व्यावसायिक रेकर्ड तोडेको छ । उनको यस फिल्मले भारतमा सर्वाधिक व्यापार गरेको छ ।

त्यसो त शाहरुखले यस वर्षको सुरुमा फिल्म पठानमार्फत बलिउड बक्स अफिस कब्जा गरेका थिए । सो फिल्मले भारतमा कुल ५ सय ४३ दशमलव शून्य ५ करोडको व्यापार गरेर नयाँ रेकर्ड बनाएको थियो । शाहरुखको पठानको रेर्कड अहिले उनकै अर्को फिल्म जवानले तोडेको हो ।

त्यसो त यस वर्ष अहिलेसम्म ३ बलिउड फिल्म ५ सय करोड क्लबमा प्रवेश गरिसकेका छन् । पठान, गदार–२ र जवानले ५ सय करोडको रेर्कड बनाइसकेका छन् । जहाँ पहिलो दुई फिल्मले आफ्नो कलेक्सनका साथ बलियो किर्तिमान बनाए । फिल्म जवानको व्यापार तेस्रो साता पुग्दा पनि त्यतिकै तीव्र गतिमा अगाडि बढिरहेको छ ।

भारतमा यस फिल्मले १७ दिनमा ५ सय ४८ दशमलव २५ करोडको कलेक्सन गरिरहेको छ । जबकि, पठानले यसअघि ५ सय ४३ दशमलव शून्य ५ करोडको व्यापार गरेर नयाँ रेर्कड बनाएको थियो । यो रेकर्ड अहिले जवानले तोडेको हो । यसरी शाहरुख खानको जवान अहिलेसम्मको सबैभन्दा धेरै कमाउने बलिउड फिल्म नचल्ने भनिएको साउथमा नै यस फिल्मले ५६ दशमलव २१ करोडको व्यापार गरेको छ ।

जवान अहिलेसम्म बनेको सबैभन्दा ठूलो फिल्म मात्रै होइन, सबैभन्दा छिटो ५ सय करोड क्लबमा प्रवेश गर्ने भारतिय फिल्म पनि साबित भएको छ । हिन्दी कलेक्सनलाई हेर्दा जवानले १८ दिनमा ५ सय करोडको आकँडा पार गरेको हो,जहाँ ५ सय करोडको व्यापार भारतमा गर्न बाहुबली २ लाई ३४ दिन,पठानलाई २८ दिन र गदार २ लाई २४ दिन लागेको थियो ।

सन् २०२३ मा शाहरुख खानले बक्स अफिसमा राज गर्दै छन् भन्नेमा कुनै शंका छैन् । डिसेम्बरमा राजकुमार हिरानीको डन्कीमा शाहरुखले अरु नयाँ के रेर्कड राख्छन् कि राख्दैनन् , त्यो भने हेर्न बाँकी नै छ ।