सीको भ्रमणले नेपाल-चीन सम्बन्धलाई नयाँ उचाइमा पुर्‍यायो: उपमन्त्री हायान

समाचार

- न्युज नेपाल

काठमाडाैँ । नेपाली भ्रमणमा रहेकी चिनियाँ कम्युनिस्ट पार्टीकी अन्तर्राष्ट्रिय विभागकी उपमन्त्री सुन हायानले राष्ट्रपति सी चिनफिङको नेपाल भ्रमणले दुई देशबीचको सम्बन्ध नयाँ उचाइमा पुगेको बताएकी छिन् ।

आइतबार होटल सोल्टीमा आयोजित नेपालका राजनीतिक दलका नेताहरूसँगको छलफलमा उपमन्त्री हायानले नेपाल-चीनबीचको सम्बन्धलाई थप प्रगाढ बनाउन राष्ट्रपति सीको भ्रमणले काम गरेको बताएकी हुन् । ‘राष्ट्रपति सीको भ्रमणले दुई देशबीचको सम्बन्धलाई नयाँ उचाइमा पुर्‍यायो,’ उनले भनिन्, ‘मेरो भ्रमण पनि सम्बन्धलाई अझै उचाइमा पुर्‍याउन हो । दुई देशबीचको सम्बन्धलाई थप प्रगाढ बनाउनुपर्छ ।’

उनले नेपालका लागि चिनियाँ राजदूतले मिहिनेत गरेर जनतासँगको सम्बन्धलाई अगाडि बढाइरहेको पनि बताइन् । ‘नयाँ परिस्थितिमा नेपाल र चीनबीच कस्तो सम्बन्ध कस्तो हुनुपर्छ ? अनि कसरी अगाडि बढ्नुपर्छ ? मेरो भ्रमणको उद्देश्य यी दुई विषयमा हुन्,’ उनले भनिन् ।

उपमन्त्री हायानले नेपालमा लगानी गर्न चिनियाँ लगानीकर्ता आतुर रहे पनि लगानीका लागि नीतिगत समस्या रहेको बताइन् । ‘नेपालमा लगानी गर्न चिनियाँ लगानीकर्ताले चाहिरहेका छन् । तर, लगानीका लागि नीतिगत समस्या रहेछ,’ उनले भनिन्, ‘मैले हिजो मात्रै नेपालमा रहेका चिनियाँ लगानीकर्तासँग कुरा गरेकी थिएँ । नेपालका परियोजनाहरू कोभिडका कारण मात्र होइन, विभिन्न कारणले ढिला हुने गरेका रहेछन् ।’

उनले एकता, विश्वास र पारस्परिक सम्बन्ध कायम राख्न सक्नुपर्ने बताइन् । उपमन्त्री हायानले कठिनाइमा दुवै देशले मिलेर काम गर्नुपर्ने बताइन् । कार्यक्रममा राष्ट्रियसभाकी उपाध्यक्ष उर्मिला अर्याल, एमाले महासचिव शंकर पोखरेल, कांग्रेस पूर्वमहामन्त्री डा. शशांक कोइराला, माओवादी केन्द्रका नेता राम कार्की, रास्वपाका सांसद शिशिर खनाललगायत नेताहरू सहभागी छन् ।