थाई राजा महा भाजिरालोङकर्नमाथि जर्मनीमा गोली प्रहार

विश्व प्रवास

काठमाडौं, ८ असार । थाइल्याण्डका राजा महा भाजिरालोङकर्नमाथि जर्मनीमा गोली प्रहार भएको छ । दुई केटाहरुले अँध्यारोमा थाई राजामाथि गोली प्रहार गरेपनि उनी सुरक्षित रहेको जर्मनीका अधिकारीहरुले बताएका छन् ।

आफ्नो धेरै समय जर्मनीमा नै बिताउने गरेका थाई राजामाथि गोली प्रहार म्युनिख विमानस्थल नजिकै साइकलमा यात्रा गरिरहेका बेला भएको थियो । अधिकारीहरुका अनुसार गत जुन १० मा १३ र १४ वर्ष उमेर समूहका केटाहरु अर्डिङमा रहेको उनीहरुको घरको झ्यालबाट एयर पिस्टल प्रयोग गरेर गोली प्रहार गरेका थिए ।

जर्मनीका अधिकारीहरुले थाई राजालाई गोली लागेको या नलागेको खुलाएका छैनन् । घटनामा कोही घाइते नभएको बताएका छन् । पिताको मृत्युपछि ६४ वर्षीय भाजिरालोङकर्नले गत वर्ष थाईल्याण्डको राजगद्दी सम्हालेका थिए । गोली प्रहार गर्ने दुई बालकमध्ये १४ वर्षीयमाथि अनुसन्धान भइरहेको बताइएको छ । १३ वर्षीय बालकमाथि भने जर्मन कानुनअनुसार अनुसन्धान गर्न उमेर पुग्दैन ।