प्रचार–प्रसार नहुँदा ओझेलमा उदयपुरको बेतिनी भन्ज्याङ

समाचार

न्युज–नेपाल संवाददाता / उदयपुर बेतिनी । उदयपुरको कटारी नगरपालिकास्थित बेतिनी भन्ज्याङ पर्यटनको लागि मुख्य आकर्षकको गन्तव्य भए पनि प्रचार–प्रसार नहुँदा ओझेलमा परेको छ । उक्त स्थलमा छिनमा घाम लाग्ने, छिनमा कुहिरो लाग्ने र गर्मी याममा पनि चिसो हुने गर्छ । यहाँ आन्तरिक तथा बाह्य पर्यटक आउँछन् । यस ठाउँको संरक्षण, संवद्र्धन र प्रचार गर्न सके मुलुकको पर्यटकीय गन्तव्य बन्न सक्ने स्थानीय बताउँछन् ।

बेतिनी भन्ज्याङको बजार ब्यबस्थापन, पर्यटनको लागि खानबस्नको सुविधा भए बेतिनी भन्ज्याङ पर्यटनको लागि आर्कषक गन्तव्य बन्न सक्ने स्थानीय केशव वस्नेतले बताए ।

पूर्व क्षेत्रकै पुरानो व्यापारिक केन्द्र कटारि बजारदेखि २२ किलोमिटर उत्तरमा पर्ने यस क्षेत्रमा घण्टा–घण्टामा मैसम परिवर्तन हुन्छ । पूर्वको पशुपति भनेर चिनिने खोटाङ हलेसी यही बाटो हुँदै जान्छ । बेतिनि यस्तो स्थान हो जहाँबाट सगरमाथा, भारत तथा नेपालको तराईको भू–भागको अवलोकन गर्न सकिन्छ ।

कटारि नगरपालिका ११ का वडा अध्यक्ष दीपक क्षेत्रीले भने,‘बेतिनि पर्यटनको एकदमै समभावना बोकेको ठाउँ हो । यहाँ हामीले भियुटावर देख्न सक्छौं । हलेसीसँग केबलकारको बिषयमा पनि हामीले छलफल अगाडि बढाएका छौँ । यहाँबाट २१ किलोमिटर तलजाँदा भित्री मधेस रहेपनि २१ किलोमिटरकै उचाइमा यस्तो ठाउँ हुनु राम्रो हो ।’

बेतिनी अहिले पनि परम्परागत उत्पादन पाउन सकिन्छ । फलफूल, सागसब्जी पनि पाउन सकिन्छ । तराईका बासिन्दा गर्मी मैसममा चिसोको लागि आउँछन् । पिकनिक मनाउनको लागि पनि यस ठाउँमा आउने गरेको स्थानीय बताउँछन् ।

केन्द्रीय तथा प्रदेश सरकार र स्थानिय तहले पर्यटन क्षेत्रको पहिचान र विकास गरी पर्यटनका माध्यमबाट रोजगारिको अवसर सिर्जना गर्ने नीतिलाई प्राथमिकतामा राखेका छन् । तर नीति एकातिर कार्यान्वयन अर्कोतिर हुने परिपाटीले बेतिनी भन्ज्याङजस्ता हजारौँ पर्यटकीय स्थलहरू ओझेलमा पर्ने गरेका छन् ।