कटारीमा निर्माणाधिन नयाँ खानेपानी आयोजनाको काम ६ महिनामा सकिने

समाचार

- सुमित्रा कार्की उदयपुर

उदयपुरको कटारीमा निर्माणाधिन नयाँ खानेपानी आयोजनाको काम ६ महिना भित्र सकिने भएको छ । निर्माणाधिन तेस्रो साना सहरी खानेपानी आयोजनाको काम ८० प्रतिशत सकिएकाले ६ महिनाभित्र उपभोक्ता धारामा पानी आउने गरी तीव्र रूपमा काम भईरहेको आयोजना निर्माण समितिका अध्यक्ष दोजराज पौडेलले बताए ।

धमाधम काम भईरहेको बताउँदै अध्यक्ष पौडेलले १८६२ धारामा पानी पूराउने काम तीव्र भइरहेको बताए । आगामी माघ भित्रमा पानी पूरा गराउने सम्झौता भएपनि त्यो भन्दा केही महिना ढिला नै भए पनि छिट्टै पानी आयोजनाको काम सकिने उनले बताए ।

कटारीको पानीट्याङ्की डाँडा र लिफटिङ्ग गरिने तावा खोला किनारमा काम भईरहेको छ । खोलाबाट ट्याङ्कीसम्म पानी लैजाने पाईप विछ्याउने काम सकिएको छ । अव ट्याङ्कीको अन्तिम चरणको काम सकिएपछि पानी वितरण योग्य हुने तयारीमा रहेको छ । यो आयोजना कटारीकै हालसम्मको ठूलो खानेपानी आयोजना हो । यो आयोजनाले कटारी बजार र आसपासका वडामा पानीको समस्या समाधान गर्नेछ ।