कृषि कर्म गर्न गाउँ फर्किएका पौडेल वडा अध्यक्ष भए

चितवन। नर्वेबाट उच्च शिक्षा हासिल गरी कृषि कर्म गर्न आफ्नै गाउँ माडीको गर्दिमा फर्किएका एक युवक माडी नगरपालिकाको वडा अध्यक्ष बनेका छन् ।

माडी नगरपालिका वडा नं १ का स्थानीयवासी ३९ वर्षीय कृष्णप्रसाद पौडेल वडा अध्यक्षमा निर्वाचित हुनुभएको हो ।

गाउँले र पार्टीको पटक पटकको आग्रहपछि आफू वडा अध्यक्षमा उम्मेदवारी दिन तयार भएको पौडेलले बताउनुभयो । सो नगरपालिकामा नेपाली काँग्रेसले एउटा वडामा मात्र अध्यक्ष जितेको छ । जित्ने व्यक्ति पौडेल हुनुहुन्छ ।

काठमाडौं विश्व विद्यालयबाट गणित विषयमा स्नातकोत्तर गरी नर्वेको युनिभर्सिटी अफ ओस्लोबाट उहाँले एमफिल समेत गर्नुभएको छ । छ वर्षको नर्वे बसाइँपछि झन्डै दुई वर्षअघि कृषि र पशुपालन गर्न उहाँ आफ्नै गाउँ गर्दि आउनुभएको होे ।

उहाँले भन्नुभयो – “काँग्रेसको क्रियाशील सदस्य पनि म होइन, समर्थक मात्र हो । पार्टीका साथीले दुई पटकसम्म आग्रह गर्दा अस्वीकार गरेको थिएँ । सबैको दबाब परेपछि उठेको हुँ ।” जित हासिल गरिसकेपछि भने आफूले नर्वेमा सिकेका सीपलाई समेत प्रयोग गरेर गाउँ बनाउने उहाँको योजना छ । काठमाडौँंका विद्यालयमा करिब १० वर्ष र काठमाडाँैं विश्व विद्यालयमा दुई वर्ष ६ महिना पढाउनुभएका पौडेलले फर्किएपछि मासिक रु एक लाख भन्दा बढी तलबको प्रस्तावसहित नेपालमा धेरै काम पाएको भए पनि कृषि कर्म गर्नकै लागि आफू गाउँ आएको बताउनुभयो ।

माडी आएपछि उहाँले आफ्नो पाँच बिगाहा जग्गामध्ये तीन बिगाहामा बीउका लागि गहुँ लगाउनुभएको छ । निकट भविष्यमै ५० वटा भँैसी पाल्ने उहाँको योजना छ । नर्वेमा झै जमिन विभाजन गरेर विकास निर्माण गर्ने र युवालाई लक्ष्य गरी कृषि र पशुपालनमा लगाउन सामूहिक मेगा कृषि परियोजना सुरु गर्ने उहाँको सोच रहेको छ ।

माडीका जनता सबैभन्दा बढी निकुञ्जका वन्यजन्तुबाट प्रभावित भएको र यसका लागि बस्ती र निकुञ्ज जोड्ने ६ किलोमिटर क्षेत्रमा तारजाली लगाउने आफ्नो योजना रहेको पनि उहाँले बताउनुभयो ।

गाउँ फर्किएपछि साथीसँग मिलेर उहाँले माडी यातायात प्रालि स्थापना गरी भरतपुर–माडी बस सेवा सुरु गर्नुभएको थियो । यसको पौडेल महासचिव हुनुहुन्छ । उच्च शिक्षापछि निकुञ्ज पारिको बस्ती माडी छाड्ने युवाका लागि पौडेल प्रेरणाको स्रोत रहेको नेपाल रेडक्रस सोसाइटी चितवन शाखाका मन्त्रीसमेत रहनुभएका माडिवासी हरि पौडेल बताउनुहुन्छ ।