अब ज्योति मगर जस्ताले नागों शरिर देखाउन नपाउने, छाडापन बढेपछि बद्री गृहमन्त्रीकहाँ पुगे

कला र साहित्य

काठमाडौं, २६ असोज । आधा शरिर देखाएर अश्लिल प्रस्तुती दिँदै आएकी ज्योती मगरजस्ता कलाकारको दिन समाप्त हुने भएका छन् । केही महिला कलाकारहरुले प्रस्तुत गर्ने प्रस्तुतिमा अश्लिलता बढ्दै गएपछि यसलाई रोक्न राष्ट्रिय लोक तथा दोहोरी गीत प्रतिष्ठान नेपालले पहल गरेको हो ।

प्रतिष्ठानले गृहमन्त्री जनार्दन शर्मालाई ज्ञापन पत्र बुझाउँदै त्यस्ता अश्लिता रोकिदिन आग्रह गरेको हो । प्रतिष्ठानका अध्यक्ष बद्री पंगेनी लगायतका पदाधिकारीहरुले बुझाएको ज्ञापनपत्रमा छाडापन रोक्ने अधिकार आफुहरुसँग नभएको भन्दै गृहमन्त्रीलाई आवश्यक कारवाही गर्न आग्रह गरेका हुन् ।

मेला–महोत्सवमा कलाकारले अश्लिल प्रस्तुती दिदा समेत स्थानीय प्रशासन मुखदर्शक बनिरहेको भन्दै प्रतिष्ठानले गृहमन्त्रीलाई ज्ञापन–पत्र बुझाएको हो ।

अध्यक्ष बद्रि पंगेनीको नेतृत्वमा गृहमन्त्री शर्मालाई कार्यकक्षमै पुगेर अश्लिल प्रस्तुतीलाई निगरानी र कारबाहीका लागि ७७ वटै जिल्ला प्रशासनमा परिपत्र गरिदिन आग्रहसहितको ज्ञापन–पत्र लिखित रुपमा बुझाईएको जानकारी गराईएको छ ।

पछिल्लो समयमा कलाकारले स्वतन्त्रता र लोकतन्त्रको सीमा र मर्यादालाई बिर्सेर चर्चा कमाउने बाहानामा अश्लिल हर्कत प्रर्दशन गर्न थालेकाले प्रतिष्ठानले राज्यलाई गुहारेको हो ।

अध्यक्ष पंगेनीले भने, ‘प्रतिष्ठानसँग नियन्त्रण र कारबाहीको अधिकार नभएकाले राज्यलाई गुहार्न बाध्य भएका हौ । हामीलाई संवैधानिक अधिकार दिए मापदण्ड निर्माण गरेर लोकक्षेत्रमा स्वच्छता दिलाउने सामर्थ छ ।’ ज्ञापनपत्र बुझ्दै गृहमन्त्री शर्माले त्यसको लागि तत्कालै आवश्यक कदम चाल्ने बताए ।