दशैंको महत्त्व बुझाएर एभरेष्टले दियो विद्यार्थीलाई विदा

समाचार

विराटनगर । दशैं, तिहार, छठलगायतका पर्वका अवसरमा विद्यालयमा विदा दिनुअघि बालबालिकालाई चाडपर्वको सांस्कृतिक महत्त्व बुझाउने क्रम बढ्दै गएको छ । विराटनगर ५ स्थित एभरेष्ट सेकेण्डरी इङ्गिलस स्कुलले एक कार्यक्रम गर्दै स–साना बालबालिकालाई चाडपर्वको महत्व बुझाउँदै रमाइलो गराएको छ ।

चाडपर्वको विदा दिँदै गर्दा ति पर्वहरू के–के हुन्छन् भन्ने विषयमा जानकारी गराएर विदा दिइएको विद्यालयका प्रिन्सिपल टिकाराम पुरीले जानकारी दिए । कार्यक्रममा दशैंका पोशाकमा सजिएर विद्यालय पुगेका बालबालिकालाई प्रिन्सिपल सहित शिक्षक शिक्षिकाले टिका र जमरा लगाई दक्षिणा दिएर विदा गरे । ‘बालबालिकाले किताबी ज्ञान मात्र नभएर हाम्रो संस्कृती, संस्कार र परम्परालाई पनि बुझ्न आवश्यक छ’ प्रिन्सिपल पुरीले भने,‘बाल्यअवस्थाबाटै हामीले हाम्रो संस्कृति बुझाउन आवश्यक छ ।’

गाउँले परिवेश झल्कने प्रदर्शनीमा राखिएका चिटिक्क परेको सानो घर, खसी, टाट्नो, मकै, ढिकि, जाँतो र डोकोलगायतका सामग्रीहरु देखेर बालबालिकासँगै अभिभावकहरू समेत रमाइरहेका थिए ।

यस्तै महान पर्व बडादशैका नवरात्रमा पुजा गरिने नौं दुर्गाको रुपमा सजिएका स–साना बालबालिका र पर्व चिनाउने सामाग्रीहरूको प्रदर्शनले सवै प्रशन्न देखिएका थिए । हरेक चाडपर्वका बेला यस्ता गतिविधिमा बालबालिकालाई प्रत्यक्ष सहभागि गराउँदै आएको एभरेष्टले लामो विदाका बेला मनाउने सवै पर्वका विषयमा जानकारी गराएको हो ।