कुलमानका पक्षमा उभिँदै कलाकार, पुनर्नियुक्तिका लागी दबाब दिने ‘ब्ल्याक आउट’ अभियान

समाचार

- न्युज-नेपाल

काठमाडौं । कलाकारहरु नेपाल विद्युत प्राधिकरणका पूर्व कार्यकारी निर्देशक कुलमान घिसिङका पक्षमा उभिएका छन् ।

प्राधिकरणको कार्यकारी निर्देशकको चार वर्षे कार्यकाल सकेर बाहिरिएका कुलमानलाई पुनः सोही पदमा नियुक्त गर्नुपर्ने पक्षमा कलाकार छन् ।

दैनिक १८ घण्टासम्म लोडसेङि भएका बेला प्राधिकरणको कार्यकारी निर्देशकको पद कुलमानले सम्हाले पछि लोडसेडिङ अन्त्य भएको थियो । प्राधिकरणबाट उनी बाहिरिएसँगै कतै पुरानै अवस्था दोहोरिने हो की भन्ने त्रासले कलाकारहरु कुलमानको पक्षमा उभिएका हुन् ।

प्राधिकरणमा कुलमानलाई पुनः नियुक्तिको माग गर्दै आजबाट हरेक साँझ बेलुकी ८ बजेपछि ५ मिनेट बत्ती निभाएर ऐक्यबद्धता जनाउन कलाकार दीपकराज गिरीले अपिल गरेका छन् । फेसबुकमा उनले लेखेका छन्, “आदरणीय साथीहरु कुलमानजीको पुनः नियुक्तिको लागि जन दबाब स्वरुप आजबाट हरेक साझ आठ बजे ५ मिनेट बत्ती निभाएर ऐक्यवद्धता प्रकट गरौं ।”

निर्देशक प्रदिप भट्टराइले पनि दीपकले जस्तै हरेक दिन आठ बजेपछि ५ मिनेट बत्ती निभाउन आग्रह गरेका छन् । उनी सामाजिक सञ्जालमा फेसबुकमा लेख्छिन्, “नराम्रा पटक पटक, राम्रा किन एक पटक ?”

यसअघि दीपकले फेसबुकमा ‘आज बसेको मन्त्रिपरिषद बैठकले कुलमान घिसिङलाई नै विद्युत प्राधिकरणको प्रमुख पदमा निरन्तरता दिने निर्णय गरेको छ ! सरकारसँग यस्तै आशयको समाचार प्रेसित गरेर जनताकै पक्षमा उभिनुको बिकल्प छैन ।’ लेखेपछि उनकै स्टाटसलाई आधिकारिक मान्दै धेरैले समाचार लेख्ने तथा बधाइदिन थालेपछि दीपकले आफूले कुलमानलाई सरकारले नियुक्त गरिसकेको भनेर नलेखेको तर यस्तै आशयको निर्णय पढ्न पाइयोस् भनेर लेखेको बताएका थिए ।

उनको स्टाटसलाई धेरैले कपी पेस्ट गरेका थिए । कलाकार केदारप्रसाद घिमिरे, जितु नेपाल, हरिवंश आचार्य, करिष्मा मानन्धर लगायतले कुलमानलाई नियुक्त गर्न माग गरेका थिए ।