एमालेको अभियान अवरोध गरेर पहिचानवादीले आफ्नै मुद्दा असफल बनाए: पोखरेल

समाचार

- न्युज नेपाल

काठमाडाैँ । नेकपा (एमाले)का महासचिव शंकर पोखरेलले पहिचानको नाममा एमाले केन्द्रित विरोधलाई जनताको तहमा अस्वीकार गरिएको दावी गरेका छन्।

विराटनगरमा आज पत्रकार सम्मेलन गर्दै उनले धनकुटामा अध्यक्ष ओलीमाथि भएको गलत प्रयास भए पनि मिडियाले सही सूचना सम्प्रेषण नगरेको गुनासो गरे।

एमालेले साझा पहिचानको कुरा गरेको बताउँदै उनले एकल पहिचानको मुद्दा लिएर चुनावमा जानेहरू नै कोशीको पक्षमा आएको बताए।

त्यसकारण पहिचानवादीले एमालेसँग गुनासो गर्न आवश्यक नभएको उनको भनाइ छ। ‘नामको विषयमा असहमति राख्नेहरूले भोट नहालेको भए भइजान्थ्यो नि, अहिले यो वितण्डा मच्चाउन आवश्यक नै थिएन नि’, उनले भने, ‘एमालेले जनतामा भनेको एजेन्डा नै लागू गरेको हो। जे भएको छ, कोशीमा जायज छ।’

पहिचानको कुरा गर्नेहरूले वैधानिक हिसाबले शान्तिपूर्ण आन्दोलन गर्नुपर्ने पोखरेलले सुझाव दिए।

मध्यपहाडी पुष्पलाल लोकमार्गको लम्बाइ घटाउनुपर्ने समेत उनले बताए। एमालेको संकल्प अभियानमा लोकमार्गको प्राविधिक अडिट गर्न प्राविधिकहरूलाई जिम्मा दिएको उनले बताए।

प्रारम्भिक रिपोर्टमा प्राविधिकहरूले मध्यपहाडी राजमार्गलाई समृद्धिसँग जोड्नका लागि ४ सय किलोमिटर लम्बाइ घटाउनुपर्ने पोखरेलले बताए। यात्राको क्रममा कतिपय जिल्लामा सर्वदलीय जस्तो बनेको, साझा समस्याहरू धेरै प्रस्तुत भएको बताउँदै सडक र मुआब्जाका विषयहरू धेरै उठेको पोखरेलले बताए।

यात्रामा आफूहरूलाई जनताले लगाएको माला जम्मा गर्ने हो भने फूलको पहाड हुनसक्ने अवस्था देखिएको भन्दै पोखरेलले यात्राले पहाडी क्षेत्रको सांस्कृतिक, सामाजिक र अर्थ राजनीतिमा नयाँ नयाँ योगदान दिएको दावी गरे। एमाले अध्यक्ष केपी ओलीप्रति वृद्धवृद्धा र बालबालिकामा अत्यन्तै आकर्षित रहेको पाइएको भन्दै उनले यात्राको क्रममा जनताले स्वतः स्फूर्त धेरै कार्यक्रम आयोजना गरेको पनि दावी गरे।

पुष्पलाल राजमार्गमा एमाले सरकार हुँदा स्मार्ट सिटि बनाउने योजनाहरू अलपत्र रहेको बताउँदै पोखरेलले मध्यपहाडलाई गुल्जार बनाउन स्मार्ट सिटीहरू बनाउनु आवश्यक भएकोमा जोड दिए।

यात्राको क्रममा सुन्तला र स्याउको पकेट क्षेत्र बनाउन सकिने देखिएको, दैलेखको पेट्रोल खानी, नदी डाइभर्सनको काम भइरहेको उनले बताए। कतिपय आयोजनाको काम छिटो हुँदा पनि भुक्तानी रोकिएको उनले बताए।