संखुवासभामा सशस्त्र प्रहरीका संस्थापक महानिरीक्षक दम्पत्तिको शालिक अनावरण !

Breaking News

- न्यूज नेपाल

काठमाडौं । सङ्खुवासभा जिल्लाको, चैनपुरमा सशस्त्र प्रहरी बल, नेपालका संस्थापक महानिरीक्षक स्व.कृष्णमोहन श्रेष्ठ र उनकी धर्मपत्नी स्व.नुडुप श्रेष्ठको अर्धकदको शालिक अनावरण गरिएको छ ।

सशस्त्र प्रहरी बल र संखुवासभा चैनपुर नगरपालिकाको संयुक्त पहलमा निर्माण गरिएको शालिक महानिरीक्षक राजु अर्यालले एक समारोहका बीच आज बिहान अनावरण गरेका हुन् ।

समारोहलाई सम्बोधन गर्दै महानिरीक्षक अर्यालले श्रेष्ठको योगदानबारे चर्चा गरेका थिए । श्रेष्ठले देखेको सपनालाई साकार पार्न र सरकारले सुम्पिएको दायित्वहरुलाई इमानदारीपूर्वक पूरा गर्न संगठन अहोरात्र खटिँदै आएको उनले बताए ।

महानिरीक्षक अर्यालले भने,‘उहाँले देखाएकै बाटो पछ्याएर संगठन अघि बढिरहेको छ । उहाँको सपना साकार पार्न र सरकारले सुम्पिएको दायित्वहरु पूरा गर्न हामी प्रतिबद्ध भएर लागिपरेका छौं ।’

अनावरण समारोहमा चैनपुर नगरपालिकाका मेयर कृष्णकुमार तामाङ्ग, उपमेयर एलिना श्रेष्ठ, पूर्वसशस्त्र महानिरीक्षक दुर्जकुमार राई, नेपाल पूर्व सशस्त्र प्रहरी संघका अध्यक्ष नारायणबाबु थापालगायतले उनीप्रति श्रद्धासुमन अर्पण गर्दै सम्मान व्यक्त गरेका थिए ।

श्रेष्ठ दम्पत्ति र अंगरक्षक सशस्त्र प्रहरी नायव निरीक्षक सूर्यप्रसाद रेग्मीलाई माओवादी द्धन्द्धकालको बेला २०५९ माघ ११ गते मर्निङ्ग वाकका दौरान ललितपुर, एकान्तकुनाको रिङ्गरोड खण्डमा लडाकुहरुले गोली हानेर मारेका थिए । त्यसपछि सरकार र माओवादीवीच केही समय युध्दविराम भयो ।