सांसद भट्टचनको पहलमा दामोदरकुण्ड र गुरुसाङ्वो गुफा पदमार्गमा दुई झोलुङ्गे पुल बन्ने !

काठमाडौं । संघीय सांसद देवीप्रकाश भट्टचनको पहलमा मुस्ताङ जिल्लाका दुई महत्वपूर्ण धार्मिक पदमार्गहरूमा झोलुङे पुल निर्माण हुने भएको छ।

सांसद भट्टचनको पहलमा नेपाल सरकारको अर्थ मन्त्रालयले आगामी आर्थिक वर्ष २०८२/०८३ का लागि झोलुङे पुल निर्माणका लागि ६ करोड रुपैयाँ बजेट विनियोजन गरेसँगै लामो समयसम्म निर्माण हुन नसकेका पुल निर्माण हुने भएका हुन् ।

कस्ता बन्छन् नयाँ पुल ?

निर्माण हुने दुई पुलमध्ये पहिलो लोघेकर दामोदरकुण्ड पदमार्ग अन्तर्गत भर्सा खोलामा ४७० मिटर लामो हुनेछ । त्यस्तै दोस्रो थासाङ गाउँपालिका–२ को नाउरिकोट–गुरुसाङ्वो गुफा पदमार्गमा ४६० मिटर लामो पुल निर्माण गरिनेछ। यी दुवै पुल सस्पेन्सन ब्रिज डिभिजन कार्यालयमार्फत निर्माण गरिने जनाइएको छ।

सस्पेन्सन ब्रिज डिभिजनका इञ्जिनीयर प्रवेश रेग्मीका अनुसार दामोदरकुण्ड जाने भर्सा खोलाको पुलको लागत अनुमान ११ करोड ४६ लाख रुपैयाँ रहेको छ । त्यस्तैगुरुसाङ्वो गुफा मार्गको पुल लागत ६ करोड रुपैयाँ रहेको छ। बहुवर्षीय ठेक्काको स्वीकृति पाउन अर्थ मन्त्रालयमा प्रक्रिया अघि बढाइएको र स्वीकृति प्राप्त भएलगत्तै ठेक्का प्रक्रिया सुरु हुने बताइएको छ।

यात्रा अवधि घट्ने

धार्मिक स्थल समुद्री सतहदेखि ५१०७ मिटर उचाइमा रहेको छ। पुल निर्माणपछि हालको ९ घण्टाको पैदल यात्रा ५ घण्टामा छोटिने अनुमान गरिएको छ। यसले तिर्थ यात्रीहरुलाई यात्रा सजिलो बनाउने छ।

यस्तै, थासाङ–२ मा पर्ने जानका लागि हाल मुख्य सडकबाट पैदल एक घण्टा लाग्ने यात्रा पुल निर्माणपछि आधा घण्टा कम हुने वडाध्यक्ष गौतम शेरचनले बताए । गुरुसाङ्वो गुफा गुरु पद्यसम्भवले ध्यान गरेको महत्वपूर्ण धार्मिक स्थल हो।

गाउँपालिका अध्यक्ष लोप्साङ छोम्फेल बिष्टले संघीय सांसद भट्टचनको सक्रियतामा पुल निर्माणको डीपीआर सम्पन्न भइसकेको र बजेट समेत विनियोजन भएको बताए। निर्माण सम्पन्न भएपछि तीर्थयात्रा, धार्मिक पर्यटन तथा स्थानीय विकासमा महत्वपूर्ण टेवा पुग्ने अपेक्षा गरिएको छ।

Comments