मतदानको दिन नै विवाह, ‘बिशेष पास’ चाहियो भन्दै निवेदन

समाज

काठमाडौं, २७ बैशाख । पहिलो चरणको निर्वाचन हुने दिन बैशाख ३१ गते कसैको विवाह भयो भने के होला ? निर्वाचन सुरक्षालाई मध्यनजर गर्दै निर्वाचनको दिन सवारी साधन चलाउन पाईदैंन् । उम्मेदवार, सुरक्षा निकाय, पर्यवेक्षक, सञ्चारकर्मी लगायतका लागि विशेष पासको व्यवस्था गरिएको छ । त्यस वाहेककाले सवारी साधन चलाउन पाईदैन् ।

तर, पास चाहियो भन्दै जिल्ला प्रशासन कार्यालयमा उम्मेदवार र पत्रकार मात्र पुगेका छैनन् । मतदानको दिन विवाह कार्यक्रम परेको भन्दै निवेदन दिने समेत भेटिएका छन् ।

स्थानीय प्रशासनले भने यो माग अस्वीकार गरेको छ । निर्वाचन सुरक्षाका कारण विवाहमा प्रयोग हुने गाडीलाई बिशेष पास दिन नसक्ने जिल्ला प्रशासन कार्यालय काठमाडौंले जनाएको छ ।
बिवाहका लागि बिशेष पास चाहियो भन्दै निवेदन आएको जिल्ला प्रशासन कार्यालयका अधिकृत महेश दाहालले बताए । तर कार्यविधीमा त्यस्तो व्यवस्था नभएका कारण पास दिन नसकिएको उनले बताए ।

काठमाडौं उपत्यकामा मात्र बढी विशेष पास वितरण भएको पाइएको छ । पत्रकारका लागि सुचना विभागको सिफारिसमा र अन्य व्यक्तिका लागि निर्वाचन आयोगको सिफारिसमा त्यस्तो पास वितरणको काम भइरहेको छ ।

जिल्ला प्रशासन कार्यालय काठमाडौंले निर्वाचन आयोगबाटै पास वितरण गरिरहेको छ । अहिलेसम्म चुनावको दिनका लागि संचारकर्मी, पर्यटक, उम्मेदवार, पर्यवेक्षक, कुटनीतिक नियोगका सवारी साधन, अन्तर्राष्ट्रिय संघ संस्था र विमानस्थलसँग सम्वन्धित संघसंस्था लगायतलाई करिब १५ सय बिशेष पास वितरण गरिसकेको छ ।