पार्टीका कार्यकर्ताद्वारा घरदैलो अभियानलाई तीव्रता

समाचार

विराटनगर । निर्वाचनको तिथि नजिकिन थालेपछि राजनीतिक दलले घरदैलो अभियानलाई तीव्रता दिएको छ ।

पार्टीका झन्डा र चुनाव चिह्नका साथ कार्यकर्ता प्रचारप्रसारलाई तीव्रता दिनुका साथै आ–आफ्ना पार्टीका घोषणापत्र र नगरको विकासका लागि मतदातासमक्ष प्रतिबद्धता प्रकट गरेर मतदातालाई आकर्षित पार्न जुटेको देखिन्छ ।

दोस्रो चरणअन्तर्गत मोरङको विराटनगर उपमहानगरपालिकालगायत ८ वटा नगरपालिका र ८ वटा गाउँपालिकामा दलका कार्यकर्ता सो अभियानलाई तीव्रता दिएका हुन् ।

राजनीतिकको केन्द्रविन्दुको रुपमा मानिएका विराटनगर उपमहानगरपालिकाका लागि आज मध्याह्नसम्म नेपाली काँग्रेस र नेकपा (एमाले), सङ्घीय समाजवादी फोरम नेपाललगायत कतिपय दलले प्रमुखलगायतका पदका उम्मेदवारका नाम अधिकारिक रुपमा टुङ्गो नलगाएको अवस्थामा पनि पार्टीगत आधारमा ती दलहरुले प्रचारप्रसारलाई तीव्रता दिएको हो ।
नेकपा (माओवादी केन्द्र) एक महिना अघिनै उम्मेदवारको नाम सार्वजनिक गरेर चुनावी प्रचारमा जुटेका छन् ।

नेपाली काँग्रेस र नेकपा (एमाले) पार्टीभित्र अधिकांश व्यक्तिको प्रमुखलगायतका पदका लागि आकाङ्क्षीको सङ्ख्या अत्यधिक रहेका कारण उम्मेदवारको अन्तिम टुङ्गो लगाउन समस्या देखिएको बताइन्छ । काँग्रेसले पहिले एमालेले उम्मेदवारको घोषणा गरोस् भन्ने सोचाई राखेको र एमालेले पनि सोहीअनुरुपको सोचाइ राखेका कारण उम्मेदवारको घोषणा हुन समय लागेको सर्वसाधारणले अड्कल गर्न थालेका छन् ।
मधेसीको हकहितका लागि सङ्घर्षरत रहेको सङ्घीय समाजवादी फोरम नेपाल र नेपाल लोकतान्त्रिक फोरमले उम्मेदवारी दिने तयारीमा जुटेका छन् ।

मुख्य राजनीतिक दलका साथै अन्य दलहरुले बढीमा दुई दिनभित्रमा उम्मेद्वारको टुङगो लगाइसकिने विश्वास गरिएको छ ।