विश्वविद्यालयको वार्षिकोत्सवका अवसरमा भवन शिलान्यास तथा उद्घाटन

कर्णाली प्रदेश

सुर्खेत,असार ३ गते । मध्यपश्चिमाञ्चल विश्वविद्यालय सुर्खेतले आफ्नो आठौं वार्षिकोत्सवका अवसरमा आइतवार विश्वविद्यालयमा नवनिर्मित एक भवनको उद्घाटन तथा दुई नयाँ भवनको शिलान्यास गरेको छ ।

५३ लाख ४६ हजार ६ सय ३६ रुपैंया १० पैंसामा निर्मित वीरेन्द्रनगर स्थित विश्वविद्यालयको केन्द्रीय पुस्तकालय भवनको मध्यपश्चिमाञ्चल विश्वविद्यालयका उपकुलपति प्रा.डा.उपेन्द्रकुमार कोइरालाले उद्घाटन गरेका हुन् । त्यसैगरी उपकुलपति प्रा.डा.कोइरालाले आगामी दुई वर्षभित्र निर्माण कार्य सम्पन्न गर्ने लक्ष्य सहित १० करोड ६५ लाख १ हजार ४ सय २९ रुपैंयाँ ५६ पैंसा लागत अनुमान गरिएको ब्यवस्थापन भवनको शिलान्यास गरेका हुन् ।

यसैगरी रजिष्ट्रार डा. महेन्द्रकुमार मल्लले कुइनेपानीमा आगामी एक वर्षभित्र निर्माण पूरा गर्ने लक्ष्य सहित २ करोड ५२ लाख ३४ हजार ८ सय ९३ रुपैंया ६ पैंसा लागत अनुमान गरिएको अतिथि आवास गृहको शिलान्यास गरेको विश्वविद्यालयका सूचना अधिकारी शेरबहादुर केसीले जानकारी दिए । विगतका वर्षहरु मन्चको कार्यक्रम गरी वार्षिकोत्सव मनाइने गरेतापनि यसपटक भने उक्त परम्परा तोड्दै निर्माण अभियानलाई जोडेर स्थापना दिवसको स्मरण गरेका छन् ।