एमाले मध्यपहाडी अभियानको दोस्रो दिनः अमरगढीमा आमसभा गर्दै

समाचार

- न्युज नेपाल

काठमाडाैँ । समृद्धिका लागि संकल्प यात्रा भनिए पनि एमालेले ‘जनता र कार्यकर्तासँग’ जोडिन यो यात्रा सुरु गरेको हो।

एमाले अध्यक्ष ओलीले बैतडीको झुलाघाटबाट समृद्धि यात्राको सुरुवात गरेका हुन्। मध्यपहाडी लोकमार्गको पश्चिम अन्तिम बिन्दु मानिएको झुलाघाटबाट मुलुकको राष्ट्रिय झन्डाको झन्डोत्तोलन गर्दै एमाले अध्यक्ष ओलीले बिहीबार संकल्प यात्राको शुभारम्भ गरेका हुन्।

समृद्धिका लागि संकल्प यात्राको दोस्रो दिन आज डडेलधुराको अमरगढीमा आमसभा गर्दैछ । भोली तेस्रो दिन १०५ किमी यात्रा गरेर मंगलसेनमा सभा गर्दैछ ।

बिहीबार नै बैतडीको गोठलापानीमा आयोजना गरिएको आमसभामा ओलीले वर्तमान सरकारी कमिसन र तस्करीको बाटोमा हिँडिरहेको आरोप लगाए। ‘एयरपोर्ट, भन्सार, इलेक्ट्रिक सामग्रीको माध्यमबाट धमाधम नेपालमा सुन भित्रिएको छ, यो सबै तस्करीको खेल हो,’ ओलीले भने, ‘यो कमिसनतन्त्रको खेल हो। सरकारले गर्दै आएका पछिल्ला गतिविधिले नै देशको अर्थतन्त्र ओरालो लागेको हो।’

१९ दिनसम्म चल्ने समृद्धिका लागि संकल्प यात्रा पुस ५ गते काठमाडाैमा आपचारिक रुपमा समापन हुने अभियानको तालिकामा उल्लेख छ ।