‘हरेक इन्च माटो रगतले भिजेको छ, आत्मसमर्पण गर्दिनँ’

किएभ । युक्रेनका राष्ट्रपति भोलोदिमिर जेलेन्स्कीले युक्रेनले कहिल्यै आत्मसमर्पण नगर्ने चेतावनी दिएका छन् । उनले रुससँग सधैं लडिरहने र हारे पनि आत्मसमर्पण भने नगर्ने जनाएका हुन् । अमेरिकी कंग्रेसको भरिभराउ संयुक्त सत्रलाई सम्बोधन गर्दै उनेल युक्रेनमा स्वतन्त्रताका लागि भएको लडाइँले आगामी पुस्ता कस्तो विश्वमा जिउनेछन् भन्ने परिभाषित गर्ने जनाए ।

जेलेन्स्कीले सबै प्रतिकूलताका विरुद्ध युक्रेन जीवित रहेको र मुकाबला गरिरहेको बताएका छन् । बारम्बारको ताली र उभिएर दर्साइएका सम्मानबीच जेलेन्स्कीले अमेरिकी जनता र कंग्रेसलाई उनीहरूको सहयोगप्रति धन्यवाद दिए । उनले खुला रूपले सोच्ने विश्वसामु रुसी अत्याचारले नियन्त्रण गुमाएको र युक्रेनले कहिल्यै आत्मसमर्पण नगर्ने अडान राखे ।

संसदमा अमेरिकी राष्ट्रपति जो बाइडनले युक्रेनलाई थप सैन्य सहायताका रूपमा झण्डै दुई अर्ब अमेरिकी डलर दिने जनाए । अमेरिकी सहयोगमा युक्रेनले माग गरिरहेको अमेरिकी पेट्रोइट भनिने जमिनदेखि हवाई प्रहारको क्षेप्यास्त्र प्रहार सम्बन्धी प्रणाली समेत छ । यसअघि बुधवार बोलेका रुसी राष्ट्रपति भ्लादिमिर पुटिनले युद्धका लागि आफ्नो देशलाई दोष दिन नहुने बताएका थिए । दुवै देशले शोक बाँडिरहेको बताएका पुटिनले युद्धका लागि तेस्रो देशका नीतिहरू जिम्मेवार रहेको भनाइ राखे ।

अमेरिकाले थप सहयोग गर्ने

बाइडनले युक्रेनका लागि व्यापक सहायताका रूपमा नयाँ वर्षमा झण्डै ४५ अर्ब डलरको सहायताको समेत बाचा गरेका छन्, जसलाई कंग्रेसले स्वीकृति दिन बाँकी छ । बाइडनले जेलेन्स्कीलाई रुससँगको युद्धमा आवश्यक पर्दासम्म अमेरिका युक्रेनसँग रहने जनाए । ‘तपाईँ कहिल्यै एक्लै उभिनुहुनेछैन’,ह्वाइटहाउसमा बाइडनले जेलेन्स्कीलाई भने ।

जेलेन्स्की युक्रेनमा रुसले अतिक्रमण सुरु गरेपछि पहिलो विदेश भ्रमणका रूपमा अमेरिका पुगेका हुन् । जेलेन्स्कीले युक्रेनलाई सघाउन अमेरिकाले दिने आर्थिक प्याकेजहरूलाई विश्वव्यापी सुरक्षाका लागि भएको लगानीका रूपमा अर्थ्याए ।

‘जमिनको हरेक इन्च रक्ताम्य’

जेलेन्स्कीले आफ्नो हालैको अग्र मोर्चामा पर्ने बक्मुत सहरको भ्रमणबारे बताउँदै त्यहाँ जमिनको हरेक इन्च रगतमा भिजेको बताए । उनले अमेरिकीहरूलाई क्रिसमसको शुभकामना दिने क्रममा युक्रेनीहरूले मैनबत्तिमा उक्त पर्व मनाउने बताए । जेलेन्स्कीले युक्रेनप्रति सद्भाव राख्ने हरेक अमेरिकी परिवार र त्यहाँका हरेक सहर र हरेक अमेरिकीप्रति धन्यवाद व्यक्त गरे । उनले युक्रेनले पूर्ण विजय हासिल गरेर छाड्ने भन्दै मन्तव्य सकेका थिए ।

Comments

• आत्मसमर्पण
• भोलोदिमिर जेलेन्स्की