प्रधानमन्त्री दाहाल १२० जनाको जम्बो टोली लिएर आज भारत जाँदै

राजनीति

- न्यूज नेपाल

काडमाडौं । प्रधानमन्त्री पुष्पकमल दाहाल प्रचण्ड ठूलो समूह लिएर आज बुधवार भारत भ्रमणमा जाँदै हुनुहुन्छ । भ्रमणमा ६ जना मन्त्री, मुख्यसचिव र ८ जना सचिवसहित झण्डै १२० जनाको समूह रहने भएको छ । भारतले प्रधानमन्त्रीको भ्रमण टोलीका लागि ४७ जनाको कोटा दिएको थियो । तर, आज प्रधानमन्त्रीसँग जानेहरुको ११५ भन्दा नाघ्ने बुझिएको छ । ४७ जनाभन्दा बढी पाहुनाको खर्च भारतले नगर्ने पनि जनाइएको छ ।

भारत भ्रमणमा जानेमध्ये २५ जना ‘उच्चस्तरीय’ को नाम मन्त्रीपरिषदले स्वीकृत गरेको छ । उनीहरुमध्ये प्रधानमन्त्रीको सचिवालयका मात्रै १० जना रहेका छन् । प्रधानमन्त्री प्रचण्डसँग उनकी छोरी गंगा दाहाल, राजनीतिक सल्लाहकार हरिबोल गजुरेल, प्रेस सल्लाहकार गोविन्द आचार्य, स्वकीय सचिव रमेश मल्ल, निजी चिकित्सक युवराज शर्मा भारत जाने छन् । नेपाल प्रहरी, सशस्त्र प्रहरी बल, नेपाली सेना र राष्ट्रिय अनुसन्धान विभागका एकएक जना सुरक्षा गार्ड पनि प्रधानमन्त्रीको टीममा परेका छन् ।