फिफा महिला विश्वकप: स्वीडेनविरुद्ध रोमाञ्चक जित निकाल्दै स्पेन पहिलो पटक फाइनलमा

समाचार

- न्युज नेपाल

काठमाडौं । फिफा महिला विश्वकपको सेमिफाइनलकाे रोमाञ्चक खेलमा स्वीडेनविरुद्ध २–१ को जित निकाल्दै स्पेन पहिलो पटक फाइनल प्रवेश गरेको छ ।

न्युजिल्यान्डस्थित इडेन पार्कमा सम्पन्न रोमाञ्चक खेलको तीनै गोल खेलको निर्धारित समय सकिन अन्तिम १० मिनेट बाँकी रहँदा भएको थियो । स्पेनको जितमा साल्मा एयिनगोनो र ओल्गा कार्मोनाले गोल गरे । स्वीडेनकी रेबेका ब्लोमभिस्टले गोल फर्काए पनि टिमको हार टार्न भने सकिनन् ।

खेलको ८१औँ मिनेटमा एयिनगोनोले गरेको गोलबाट स्पेनले अग्रता बनाएको थियो । तर, ८८औँ मिनेटमा ब्लोमभिस्टले गोल गर्दै स्वीडेनलाई खेलमा फर्काएकी थिइन् । यसको एक मिनेटपछि नै कार्मोनाले गोल गर्दै पुनः स्पेनलाई अग्रतामा राखेकी थिइन् ।

यसपछि दुवै टिमबाट गोल हुन नसक्दा स्पेनले विश्वकपको तेस्रो सहभागितामा नै फाइनलसम्मको यात्रा निश्चित गरेको हो ।

सन् २०१५ अघिसम्म विश्वकपमा छनोट भएको थिएन । र, यस संस्करणअघि प्रि–क्वार्टरफाइनल प्रवेश गर्नु नै स्पेनको सबैभन्दा ठूलो उपलब्धि थियो ।

समूह ‘सी’को उपविजेताका रूपमा नकआउट चरणमा प्रवेश गरेको स्पेनले प्रि–क्वार्टरफाइनलमा स्वीट्जरल्यान्ड र क्वार्टरफाइनलमा साविक उपविजेता नेदरल्यान्ड्सलाई हराएको थियो ।

यता, सेमिफाइनलसम्मको यात्रा तय गर्दा समूह ‘जी’को विजेता स्वीडेनले अन्तिम–१६ मा साविक विजेता अमेरिका र क्वार्टरफाइनलमा सन् २०११ को च्याम्पियन जापानको चुनौती पन्छाएको थियो ।

स्पेनले अब उपाधिका लागि इंग्ल्यान्ड र घरेलु टिम अस्ट्रेलियाबीचको विजेतासँग खेल्ने छ । यी दुई टिमबीचको दोस्रो सेमिफाइनल भोलि (बुधबार) दिउँसो ३ः४५ बजेदेखि सुरु हुनेछ ।