तीनकुने सामूहिक हत्यामा एक जना युवकको मात्र संलग्नता रहेको प्रहरी अनुसन्धान बाट खुल्यो

Breaking News

- न्युज नेपाल

काठमाडौं । तीनकुनेमा शुक्रबार राति भएको सामूहिक हत्यामा एक जना युवकको मात्र संलग्नता भएको प्रहरीको प्रारम्भिक अनुसन्धानले देखाएको छ ।

घटनामा संलग्न भएको आशंकामा प्रहरीले सीसीटीभी फुटेजका आधारमा आइतबार ती युवकलाई पक्राउ गरेको थियो । उनले चार जनाकै हत्या आफूले गरेको प्रहरीलाई बयान दिएका छन् ।

बयानअनुसार उनी मोरङ घर भएका १९ वर्षका नवीन राईको हत्या गर्न सःमिलमा पुगेका थिए । घटनाबारे थाहा पाउने भएपछि उनले अरुमाथि पनि अन्धाधुन्ध आक्रमण गरी चारै जनाको हत्या गरेको प्रहरी अनुसन्धानबाट खुलेको छ ।

आक्रमणमा परी दोलखा घर भई उक्त मिलमा कार्यरत ५५ वर्षीय कुमार भुजेल, उनकी श्रीमती शुभद्रा र आमा ७० वर्षकी सुमित्रा भुजेलको मृत्यु भएको छ ।

घटनाबारे खबर गर्न २८ वर्षका दीपेन्द्र राई तीनकुनेस्थित प्रहरी वृत्त नयाँ बानेश्वर पुगेका थिए । कपडा र जुत्तामा रगत लागेको अवस्थामा पुगेका उनलाई पनि प्रहरीले नियन्त्रणमा लिएर अनुसन्धान गरिरहेको थियो ।

तर, सीसीटीभी फुटेजमा दीपेन्द्र ११ बजेर १३ मिनेटमा सःमिलमा प्रवेश गरेर ११ः३३ मा निस्किएको पाइएको छ । उनी प्रहरी कहाँ पुग्दा ११ः५५ बजेको थियो ।

यो घटना उनी पुग्नुभन्दा पहिला नै भएको प्रहरीको अनुसन्धानबाट देखिएको छ । त्यसअनुसार आइतबार अर्का एक युवक पक्राउ परे र उनले आफ्नो संलग्नता स्वीकार गरेका छन् ।

पक्राउ परेका युवकलाई म्याद थपका लागि जिल्ला अदालत काठमाडौं लैजाने प्रहरीको तयारी छ ।