एमाले बागमती अधिवेशन: ११ बजेदेखि हुने भनिएको मतदान अझै सुरु भएन

राजनीति

- न्युज नेपाल

काटमाडाैँ । पाँच दिनदेखि राजधानी काठमाडौंमा जारी नेकपा एमाले बाग्मती प्रदेश अधिवेशनमा नेतृत्व चयनका लागि हुने भनिएको मतदान अझै शुरू भएको छैन ।

पछिल्लो पटक संशोधित निर्वाचन कार्यतालिका अनुसार शुक्रबार बिहान साढे ११ बजेबाट मतदान प्रक्रिया शुरू हुनु पर्ने थियो । तर, १२ बजिसक्दा पनि निर्वाचन शुरू भएको छैन ।

निर्वाचन अधिकृत डिल्ली मैनालीले तयारी पूरा भएको जानकारी दिए । केही बेरमा मतदान शुरू हुने उनले बताए । मतदातालाई लाइन लगाउने तयारी गरिएको उनले बताए ।

यस्तै अबको एक घण्टामा मतदान शुरू हुने अध्यक्षका उम्मेदवार कृष्ण दाहालले बताए ।

सहमतिको प्रयासका लागि भन्दै मतदान पर पर धकेलिएको हो । तर, अध्यक्षका आकांक्षीले नेताको निर्देशन नमानेपछि नेतृत्व चयन चुनावी प्रक्रियामा गएको हो ।

तीनजना प्रत्यासी पछि हटेपछि अध्यक्षका लागि कृष्णप्रसाद दाहाल र कैलाश ढुंगेल चुनावी मैदानमा छन् ।

अधिवेशन लम्बाइएपछि कार्यकर्ताले भने आक्रोश व्यक्त गरेका छन् । ‘२ दिनमा सम्पन्न गर्ने भनिएको प्रदेश अधिवेशन एक साता लम्बिँदा बाहिर राम्रो सन्देश गएको छैन, नेतृत्वको कार्यशैलीप्रति कार्यकर्ता आक्रोशित बनेका छन्,’ एक अधिवेशन प्रतिनिधिले लोकान्तरसँग भने ।

यसअघि बिहान ८ बजे देखि नै मतदान गर्ने भन्दै कार्यकर्ता मतदान स्थल च्यासल पुगेका थिए । एमाले केन्द्रीय च्यासलमा विद्युतीय मेसिनबाट मतदान गर्ने निर्वाचन समितिको तयारी छ ।