कम्युनिस्ट आन्दोलनमा लागेका विद्यार्थीले मनमोहनको सादगीपूर्ण जीवनीबारे बुझ्नुपर्छ: ईश्वर पोखरेल

Breaking News

- न्युज नेपाल

काठमाडाैँ । नेकपा एमालेका वरिष्ठ उपाध्यक्ष ईश्वर पोखरेलले मनमोहन अधिकारीलाई कम्युनिस्ट आन्दोलनको निरन्तरताको पर्यायका रूपमा बुझ्न आवश्यक रहेको बताएका छन् ।

बिहीबार ललितपुरमा मनमोहन स्मृति प्रतिष्ठानको आयोजनामा मनमोहन अधिकारीको २५ औँ स्मृति दिवसको अवसरमा आयोजित कार्यक्रमलाई सम्बोधन गर्दै उनले स्वर्गीय नेता अधिकारी अनेक उत्तारचढाव भए पनि कहिले पनि खण्डित नभएको बताए ।

उनले शासन सत्तामा रहँदा मात्रै नभई नेता अधिकारी प्रतिकूल अवस्थामा समेत स्थिर रहेको बताए । उनले कम्युनिस्ट आन्दोलनभित्र देखापर्ने कुनै पनि अतिवादमा अधिकारी नरहेको बताए । वरिष्ठ उपाध्यक्ष पोखरेलले स्वभाव र विचारमा नरम देखिए पनि देब्रे वा दाहिने विचार र प्रवृत्तिको विरोधमा अधिकारी रहेको बताए ।

उनले अहिलेको कम्युनिस्ट आन्दोलनमा लागेका विद्यार्थीहरूले मनमोहन अधिकारीको सादगीपूर्ण जीवनीका बारेमा जान्न आवश्यक रहेको बताए । ‘मनमोहन अधिकारीलाई हामीले कम्युनिस्ट आन्दोलनको निरन्तरताको पर्यायका रूपमा पनि बुझ्नुपर्छ । कम्युनिस्ट आन्दोलनभित्र देखापर्ने कुनै पनि अतिवादमा उहाँ रहनुभएन । अहिलेको कम्युनिस्ट आन्दोलनमा लागेका विद्यार्थीहरूले मनमोहन अधिकारीको सादगीपूर्ण जीवनीका बारेमा जान्नुपर्छ,’ उनले भने ।