इजरायलले गर्‍यो इरानमा हमला, आक्रमणबारे अहिलेसम्म हामीलाई के थाहा छ ?

काठमाडाैं । इजरेलले इरानको परमाणु कार्यक्रमहरूमा हमला गरेको इजरेली डिफेन्स फोर्सले बताएको छ । इरानको राजधानी तेहरानका विभिन्न स्थानमा विस्फोटका आवाजहरू सुनिएका छन्।

इजरेली प्रधानमन्त्री बेन्जमिन नेतन्याहुले उक्त हमला ‘अपरेशन राइजिङ लाइअन’ नाम दिइएको सैन्य कार्वाही को एक भाग भएको भन्दै इरान इजरेलको “अस्तित्वको लागि” खतरा भएको बताएका छन्।

नेतान्याहूले इरानविरुद्ध आवश्यकता परुन्जेल आक्रमण जारी रहने जिकिर गरेका छन् । उनले इरानको परमाणु प्रशोधन केन्द्रको मुटुमा प्रहार गरेको भन्दै इजरायली सेनालाई धन्यवाद समेत दिएका छन् ।

इजरेलले जबाफी हमलाको अपेक्षा गर्दै देशमा संकटकालको घोषणा गरेको छ।

इरानको रिभोलुशनरी गार्डस्‌को मुख्यालयमा इजरेली हमला भएको इरानी सरकारी सञ्चार माध्यमले जनाएको छ। स्थानीय मिडियाले पनि त्यहाँ आगो लागेको र धुवाँ आइरहेको जनाएका छन्।

इरानको प्रतिक्रिया के छ ?

इरानका सर्वोच्च नेता आयातोल्लाह अली खामेनेइले हमला गरेर इजरेलले उसको ‘नीच स्वभाव’ प्रकट गरेको भनेर टिप्पणी गरेका रोएटर्स समाचार संस्थाले उल्लेख गरेको छ।

‘हमला गरेर इजरेलले आफ्नो निम्ति दुर्भाग्य निम्त्याएको र त्यो अवश्यम्भावी रहेको’ इरानी सर्वोच्च नेताले बताएको उल्लेख छ।

अमेरिकामाथि आरोप

इरानको सैन्य फौजका एक प्रवक्ताले ‘इजरेलले अमेरिकाको सहयोगमा आफ्नो देशमा आक्रमण गरेको’ बताएको इरानी सरकारी सञ्चार माध्यमहरूले जनाएका छन्। तर यसअघि अमेरिकी विदेशमन्त्री मार्को रुबियोले ती हमलामा ‘वाशिङ्टन सामेल नभएको’ दाबी गरेका थिए ।

इजरायली आक्रमणमा परेर इरानको शक्तिशाली सैन्य संगठन इस्लामिक रिभोलुसनरी गार्ड कोर (आइआरजिसी)का प्रमुख मारिएको अलजजीराले बताएको छ। शुक्रबार बिहान इजरायलले गरेको आक्रमणमा आइआरजिसीका कमान्डर इन् चिफ मेजर जनरल हुसेन सलामीको मारिएको बताइएको छ।

विभिन्न अन्तर्राष्ट्रिय सञ्चारमाध्यमहरुले इरानको सरकारी टेलिभिजनलाई उद्धृत गरेर आइआरजिसी हुसेन मारिएको बताएका हुन्।

उनलाई इरानका सर्वोच्च नेता आयतोल्लाह अल खामेनीले सन् २०१९ मा आइआरजिसीका कमान्डर इन् चिफ नियुक्त गरेका थिए।

शुक्रबार बिहान इसराइलले आइआरजिसीको मुख्यालयमै हवाई आक्रमण गरेको बताइएको छ। सोही आक्रमणमा उनको मृत्यु भएको बताइएको छ।

Comments