तरुण दलका केन्द्रीय सदस्यद्वयले तोडे आमरण अनशन

breaking news

काठमाडौं । तरुण दलका केन्द्रीय सदस्यद्वय रोजन राई र अम्बिका बास्कोटाले चार दिनदेखिको आमरण अनशन तोडेका छन् । कांग्रेस उपसभापति पूर्णबहादुर खड्काले जुस खुवाएर उनीहरुको अनशन तोडाएका हुन् ।

विद्वान गुरुङ नेतृत्वको तरुण दल तदर्थ समिति भंग गर्नुपर्ने माग गरेका उनीहरुले पार्टीसँग सहमति भएपछि आमरण अनशन तोडेको बुझिएको छ । नेता द्वय वर्तमान तदर्थ समिति महाधिवेशन गर्न असक्षम भएकाले भंगको माग गर्दै यही असार १५ गते आइतबारदेखि सत्याग्रहमा बसेका थिए ।

पार्टीको निर्देशक समितिको सक्रियतामा तरुण दलको अधिवेशन आगामी मंसिर २६ देखि २८ सम्म गर्ने गरी प्रतिवद्धता जाहेर गरेपछि उनीहरुले अनसन तोडेका हुन् । अधिवेशन गराउनका लागि पार्टीले तरुण दलमा सानो आकारको व्यवस्थापन समिति बनाउने समेत सहमति बनेको छ । कांग्रेस महामन्त्री गगन थापाले तरुण दलमा सानो आकारको व्यवस्थापन समिति बनाउने सहमति पत्रलाई पढेर सुनाएका थिए ।

महाविधेशन गराउने कार्यदेशसहित २०७८ बाट गुरुङ नेतृत्वमा तदर्थ समिति गठन गरिए पनि उक्त कमिटीले एउटा जिल्लामा पनि अधिवेशन गराउन सकेको छैन । गुरुङ नेतृत्वको कमिटीलाई ६ महिनाको समय थपेर पार्टीले नै अधिवेशनको जिम्मा लिने भएको हो । तरुण दलले ७ वर्षदेखि नै अधिवेशन गर्न सकेको छैन । असन्तुष्ट पक्षले वर्तमान समिति भंग गर्नका लागि ६ बुँदे कारण देखाएको थियो ।

राई र बास्कोटा नेपाली कांग्रेसको केन्द्रीय पार्टी कार्यालय सानेपाको मूल गेटमा सत्याग्रहमा रहँदा तरुण दलका अन्य केन्द्रीय सदस्यहरु, पार्टीका नेता कार्यकर्ताहरुलगायतले साथ दिएका थिए ।

Comments

प्रकाशित मिति : 2025-07-02

तरुण दलका केन्द्रीय सदस्यद्वयले तोडे आमरण अनशन

Comments

अरु समाचार