सेनाले ५० मेगावाटको दूधखोला जलविद्युत बनाउने

समाज

- न्युज–नेपाल संवाददाता

काठमाडौं । नेपाली सेनाले ५० मेगावाटको दूधखोला जलविद्युत आयोजना निर्माण गर्न चासो देखाएको छ । सैनिक मुख्यालयले रक्षा मन्त्रालयमार्फत विद्युत विकास विभागलाई पत्र लेख्दै २५ देखि ५० मेगावाट क्षमताको आयोजना निर्माण जिम्मा दिन माग गरेको हो । रक्षाका अधिकारीका अनुसार सेनाको चासो मनाङको ठोचेमा प्रस्तावित दूधखोला आयोजना हो । सरकारले सर्भे लाइसेन्स दिए दूधखोलालाई सेनाको पहिलो आयोजना रुपमा अघि बढाउने गृहकार्य गरेको छ ।

दूधखोलाबाट ५० मेगावाट बिजुली उत्पादन गर्ने भन्दै हिमालयन ऊर्जा विकास कम्पनीले सर्भे लाइसेन्सका लागि विद्युत विकास विभागमा आवेदन दिएको छ ।

सीता हाइड्रोपावर कम्पनीले २५ मेगावाट बिजुली निकाल्ने गरी सर्भे अनुमति मागेको छ । तर, यो खोलाका लागि अध्ययन अनुमति पत्र अहिलेसम्म जारी गरिएको छैन । अब सेनाले पनि यही आयोजनामा चासो देखाएपछि सम्भवतः सेनाले नै यो आयोजनाको निर्माण गर्नेछ ।

सेनाको कल्याणकारी कोषमा करिव ३२ अर्ब रुपैयाँ थन्किएको छ । सेना उक्त रकमबाट आयमूलक काममा लगानी गर्न तयार रहेको हो । उसले सेनाका लागि आवश्यक पर्ने कपडादेखि प्रशोधित पानी प्लाण्ट निर्माणमा पनि प्रकृया अघि बढाएको छ ।