सरकार ! उपचार गराउन कहाँ जाने ?

दिनदिनै मानिसहरू बिरामी हुन्छन् । डाक्टरको लापरबाहीले बिरामीको ज्यान जाने घटना बढ्दै गएको पनि छ । कारण सरकारले जुन डाक्टरको लापरबाहीले बिरामीको ज्यान गएको हो उसैले क्षतिपूर्ति ब्यहोर्नु पर्ने ऐन बनाउन स्वास्थ्य मन्त्रालयलाई निर्देशन दिएपछि डाक्टरहरूले आन्दोलन गर्न थाले । जस कारण देशको स्वास्थ्य क्षेत्र अस्तव्यस्त बनेको छ । मैले धेरै दिनदेखि देशभरका ओपिडी सेवा बन्द छन् भन्ने समाचार सुनेको थिएँ तर मलाई सबै बन्द होलान् भन्ने चैं लागेको थिएन । म बसुन्धाराको ईसान बाल अस्पतालमा पन्ध्र महिनाको बिरामी छोरा बोकेर पुग्दा मेरो जस्तै बिरामी बच्चाहरू धेरै देखेँ । यहाँ त उपचार भइरहेको रहेछ भनेर खुसी पनि भएँ । टिकट काउन्टरमा जाँदा–‘बिरामी कस्तो हो ? ओपिडि बन्द छ, आकस्मिक कक्षमा जानुस्’ भनियो । जाँदा ‘डाक्टर हुनुहुन्न’ भनेर एउटी महिलाले भनिन् । उनी पनि बिरामी बच्चा लिएर नएकी रैछिन् । के गर्ने होला ! मेडिकलको औषधीले छोएन । डाक्टर आउँछन् होला भनेर आएको तर आज पनि छैन भन्दै आत्तिदै थिइन् । धेरै दिनदेखि बिरामी परेकोले आत्तिनु पनि स्वाभाविक नै थियो । मेरो बाबुलाई सामान्य ज्वरो आएको हुनाले औषधी किनेर फर्किएँ । तर अरू बिरामीहरूको हालत यहाँ लेखिसाध्य छैन् । आकस्मिक कक्ष खोलिए पनि बिरामी लिएर जाँदा डाक्टरले नहेर्ने भनेपछि बिरामीहरू मेडिकलमा उपचार गराउन बाध्य भए । साधारण बिरामीलाई त मेडिकलले दिएको औषधीले ठीक गर्ला तर थलिएका बिरामी, आकस्मिक चोटपटक लागेका बिरामी, आठ महिनासम्म अस्पातलमा महिनै पिच्छे जाँच गराउन गएकी गर्भवती महिलाको नौ महिना पुरा भए लगाएतका बिरामी अब कहाँ जाने ?  दशैँको बेलामा घरमा मानिस बिरामी  भएपछि कसरी खुसीले चाड मनाउने ? जनताले कहिले होला आनन्दले रमाउन र कमाउन पाउने । हामीकहाँ अचम्मको व्यवस्था छ ! जसलाई जे मन लाग्यो त्यही गर्न छुट छ । कुनै कुरा मिलेन भने बाटो बन्द, कुनै माग पूरा भएन भने स्कुल बन्द, कहिले नाका बन्द, हुँदाहुँदा अब त अस्पताल पनि बन्द ? के बन्दले नै सबै माग हुन्छ ? सोचौं । वार्ता, छलफल र संवादका माध्यमबाट समस्याको समाधान गरौं । अनाहकमा जनतालाई दुःख दिनु अपराध हो ।

यो पनि पढ्नुहोस् ।

http://news-nepal.com/%e0%a4%af%e0%a4%b8%e0%a4%b0%e0%a5%80-%e0%a4%a0%e0%a4%97%e0%a5%8d%e0%a4%9b%e0%a4%a8%e0%a5%8d-%e0%a4%9f%e0%a5%8d%e0%a4%af%e0%a4%be%e0%a4%95%e0%a5%8d%e0%a4%b8%e0%a5%80-%e0%a4%9a%e0%a4%be%e0%a4%b2/

Comments