हनुमानढोकादेखि स्वयम्भूसम्मको पदयात्रा सुरु

समाचार

काठमाडौं, २ वैशाख। काठमाडौंको बसन्तपुरस्थित विश्व सम्पदा हनुमानढोका दरबार क्षेत्रदेखि स्वयम्भूसम्मको पदयात्रा सुरु भएको छ ।

विश्वसम्पदा सूचीमा सूचीकृत हनुमानढोकादेखि अर्को विश्वसम्पदा स्वयम्भूसम्मको यात्रा पैदल रुपमै गर्न सकिन्छ भन्ने सन्देश पर्यटकहरुबीच पुर्‍याउने उद्देश्यका साथ आइतबारदेखि पदयात्रा सुरु भएको हो ।

पैदल यात्राको पहिलो दिन आइतबार हनुमानढोकादेखि स्वयम्भूसम्मका सम्पदाहरुको सफाइ गरिएको छ । अभियानको एक कार्यक्रमका बीच बसन्तपुरमा शुभारम्भ गर्दै काठमाडौं क्षेत्र नम्बर ८ का प्रतिनिधिसभाका सांसद जीवनराम श्रेष्ठले बसन्तपुरदेखि स्वयम्भूसम्म पैदल यात्रा गरेर यस क्षेत्रलाई विश्वका पर्यटकहरुको केन्द्र बनाउन चाहेको स्पष्ट पारे ।

उनले भने “सम्पदाको भण्डार रहेको काठमाडौंको सम्पदाहरुको संरक्षण र सम्वर्द्धन गर्दै यसलाई पर्यटक उद्योगको रुपमा स्थागित गराउने योजना अन्तरगत पदयात्राको अभियान सुरु गरिएको हो ।”

काठमाडौं महानगरपालिकाका मेयर विद्यासुन्दर शाक्यले अभियानले नेपालको आन्तरिक पर्यटन प्रवर्द्धनमा महत्वपूर्ण भूमिका निर्वाह गर्ने विश्वास व्यक्त गर्नु भयो ।

अभियान अन्तरगत वैशाख ३ गते विद्यार्थीहरुले पदयात्रा गर्नेछन । त्यसैगरी ४ गते विभिन्न खेलकुद अभियान, ५ गते फोटो पत्रकारहरुलाई त्यस क्षेत्रका सबै सम्पदाको अवलोकन गराउने र ६ गते हुलाक टिकट प्रर्दशनी गरिने काठमाडौं महानगरपालिकाले जानकारी दिएको छ ।

वैशाख ७ गते चित्रकला प्रर्दशनी हुनेछ भने ८ गते अभियान समापन गरिनेछ । काठमाडौंका स्थानीय सम्पदाहरुको उचित संरक्षण गर्न पनि अभियान सुरु गरिएको काठमाडौं महानगरपालिकाले जनाएको छ । विश्व सम्पदा दिवसको अवसर पारेर काठमाडौं महानगरपालिकाको संयोजनमा सुरु गरिएको पैदल यात्रा ६ दिनसम्म चल्नेछ ।