सीपीलाई प्रचण्डको प्रश्न– राप्रपाको अध्यक्ष बन्न लाग्नुभएको हो ?

राजनीति

- न्युज नेपाल

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले नेकपा (माले)का महासचिव सीपी मैनालीलाई राप्रपा अध्यक्ष बन्न लाग्नुभएको हो ? भन्दै प्रश्न गरेका छन् ।

बुधबार काठमाडौंमा राप्रपाको एकता महाधिवेशनको उद्घाटन समारोहमा शुभकामना सन्देश दिँदै उनले ‘सीपी मैनाली हिजो राजतन्त्र सिध्याउन लागिपरेको मान्छे आज राजाको जयजयकार गर्दै हिँडेको’ बताए । उनले मैनालीलाई राप्रपा अध्यक्ष बन्न खोजेको हो ? भन्दै प्रश्न पनि गरे ।

“राजतन्त्र सिध्याउन ‘टाउको काट्ने’ हिजो सुरुवात उहाँले गर्नुभयो, अहिले राजा महान् भन्नुभयो,” उनले भने, “सीपीजी राप्रपा अध्यक्ष बन्न लाग्नुभयो कि जस्तो लाग्यो, त्यसो हो भने बधाई छ ।”

प्रचण्डभन्दा अगाडि बोलेका सीपीले राजा महेन्द्रलाई एक मात्र राष्ट्रवादी नेता भएको भन्दै प्रशंसा गरेका थिए । सीपीले प्रचण्डलाई आन्दोलनको नाममा विदेशी शक्तिलाई स्वागत गरेको आरोप लगाएका थिए ।