प्रधानमन्त्रीको चीन भ्रमण सफल बनाउन सबै दलहरु एकमत

राजनीति

- न्युज नेपाल

काठमाडौं । प्रधानमन्त्री पुष्पकमल दाहाल प्रचण्डको चीन भ्रमण सफल बनाउनेमा संसद्‌मा प्रतिनिधित्व गर्ने दलहरु एकमत भएका छन्।

आइतबार सिंहदरबारमा बसेको सर्वदलीय बैठकमा प्रधानमन्त्रीको भ्रमण सफल बनाउनेबारे सहमति भएको परराष्ट्रमन्त्री एनपी साउदले जानकारी दिए।

असोज पहिलो साता हुने आफ्नो चीन भ्रमण र भ्रमणका अजेन्डाबारे छलफल गर्न प्रधानमन्त्री प्रचण्डले आइतबार सर्वदलीय बैठक बोलाएका थिए। बैठकमा पूर्व प्रधानमन्त्रीसहित संसद्‌मा प्रतिनिधित्व गर्ने दल नेता र प्रतिनिधिहरु सहभागी थिए।

छलफलपछि सञ्चारकर्मीसँग कुरा गर्दै परराष्ट्रमन्त्री एनपी साउदले प्रधानमन्त्रीको चीन भ्रमण सफल बनाउनेबारे दलहरुमा साझा सहमति भएको बताए। उनले भने, ‘प्रधानमन्त्रीको चीन भ्रमणबारे पूर्व प्रधानमन्त्रीहरु, विभिन्न राजनीतिक दलका सभापति तथा प्रतिनिधि, पूर्व परराष्ट्रमन्त्रीहरुलाई आमन्त्रण गरेर आशन्न चीन भ्रमणका बारेमा गम्भीर छलफल भएको छ। अहिलेको सन्दर्भमा संयुक्त राष्ट्रसंघमा या चीन भ्रमणका सन्दर्भमा पनि गर्नु पर्ने आवश्यक तयारी राख्नु पर्ने प्रस्ताव, अपनाउनुपर्ने सावधानी र गर्नुपर्ने कामका बारेमा महत्त्वपूर्ण सुझाव र सल्लाह दिनु भएको छ।’

बैठकबाट प्रधानमन्त्रीको भ्रमणबारे महत्त्वपूर्ण सुझावहरु प्राप्त भएको र सुझावहरुलाई सरकारले महत्त्वका साथ लिएको मन्त्री साउदको भनाइ छ। ‘प्रधानमन्त्री ज्यूले आमन्त्रित सम्पूर्ण दललाई धन्यवाद दिनुभएको छ।

उहाँहरुले दिनुभएको सल्लाह सुझावलाई सरकारले अत्यन्तै महत्त्वपूर्ण रुपमा लिएको छ,’ साउदले भने, ‘आसन्न भ्रमण सफल बनाउने क्रममा नेपालको सबै राजनैतिक तह तप्कामा सहमति भएको छ।’

Comments

प्रकाशित मिति : 2023-09-10

प्रधानमन्त्रीको चीन भ्रमण सफल बनाउन सबै दलहरु एकमत

Comments

अरु समाचार