संखुवासभाको बाह्रबिसेमा आगलागीबाट पाँच घर जलेर नष्ट

कोशी प्रदेश

काठमाडौं । संखुवासभा जिल्लाको सभापोखरी गाउँपालिका–६, बाह्रबिसेमा आगलागी हुँदा पाँच घर जलेर नष्ट भएका छन् । बुधबार दिउँसो करिब साढे २ बजेदेखि सुरु भएको आगोले पाँचवटा घर जलेर नष्ट भएको जिल्ला प्रहरी कार्यालय संखुवासभाका प्रहरी निरीक्षक रामकुमार लामिछानेले बताएका छन् ।

लामिछानेका अनुसार स्थानीय रामबहादुर राई, अमृता राई, लालसिंह लिम्बू र सुशील तामाङका दुईवटा गरी पाँचवटा घर जलेर नष्ट भएका हुन्। स्थानीय रामबहादुर राईको घरभित्रको अगेनाबाट आगो सल्किएको र बाँकी घरमा फैलिएको प्रहरीले जनाएको छ ।

सभापोखरी गाउँपालिकाका अध्यक्ष भीमबहादुर लिम्बूले स्थानीय र प्रहरीको सहयोगमा आगो करिब दुई घण्टापछि नियन्त्रणमा आएको जानकारी दिएका छन् । आगलागीबाट कुनै मानवीय र पशुचौपायाको क्षति नभएको गाउँपालिका अध्यक्ष लिम्बूको भनाइ छ।

आगलागी भएको ठाउँ सभापोखरी गाउँपालिकाको केन्द्र बाह्रबिसे बजार क्षेत्रमा नै पर्दछ । अहिले सो क्षेत्रमा इन्टरनेट र टेलिफोन सम्पर्कविहीन भएको जिल्ला प्रहरी कार्यालयको भनाइ छ। प्रहरीले आगलागीको कारण र क्षतिको बारेमा अनुसन्धान गरिरहेको जनाएको छ ।