पूरातत्व विभागले धरहराको पुनः निर्माणका लागि अध्ययन पूरा गर्यो

अर्थ र बाणिज्य

- बिमला सापकोटा / न्युज-नेपाल

काठमाडौँ । पूरातत्व विभागले धरहराको पुनःनिर्माणका लागि करिब रु दुई अर्ब ८० करोडको लागत लाग्ने अनुमान गरेको छ । विभागले अब बन्ने धरहराको नक्साङकन, डिजाइन र अनुमानित लागत तय गरेपछि त्यसको निर्माण सम्पन्न गर्दा सम्मको लागत अध्यन गरिएको हो ।

अध्ययन प्रतिवेदनअनुसार करिब ४२ रोपनी क्षेत्रफलमा फैलिएको स्थानमा निर्माण गरिने धरहरा दुईसय ४५ फिट अग्लो हुनेछ । घुम्न आउने स्वदेशी तथा विदेशीका लागि मनमोहक बगैँचा तथा अन्डरग्राउन्ड पार्किङको व्यवस्था गरिने भएको छ ।विभागले नयाँ धरहरालाई पछिल्लो समय विकसित भएका प्रविधिको समेत बढि उपयोग गरी बलियो बनाउने विषयमा अध्ययन गरिरहेको थियो ।

गतवर्ष २०७२ बैशाखको भूकम्पका कारण क्षतिग्रस्त भएको धरहराको संरचना अहिलेको अवस्थामा कस्तो हुनुपर्ने भनेर विभागले गरेको अध्ययनमा आधुनिक सामग्रीको उपयोग गरी पुरानै शैलीमा विकास गरिने निस्कर्ष निकालिएको छ ।

विभागका महानिर्देशक भेषनारायण दाहालका अनुसार सो अध्ययन प्रतिवेदन एक साताभित्र नेपाल टेलिकमलाई हस्तान्तरण गरिनेछ, सोही प्रतिवेदनका आधारमा उक्त सम्पदा सो संस्थाले निर्माण गरिदिनेछ । टेलिकमले धरहरा पुनःनिर्माण गर्ने प्रतिबद्धता जनाएगत्तै विभागले त्यसको अध्ययन सुरु गरेको थियो ।