तीव्र दरमा कर्जाको विस्तार गरेसँगै वाणिज्य बैंकहरूको खराब कर्जा दर बढ्यो

अर्थ र बाणिज्य

काठमाडौं, ८ जेठ । वाणिज्य बैंकहरूको खराब कर्जाको दर बढ्दै गएको छ । बैंकहरूले तीव्र दरमा कर्जाको विस्तार गरेसँगै खराब कर्जाको दर बढेको हो । गत चैत मसान्तमा वाणिज्य बैंकहरूको औसत निष्क्रिय कर्जा गत असार मसान्तको तुलनामा चार आधार बिन्दुले बढेको नेपाल बैंकर्स संघले जनाएको छ ।

जबकि, यही अवधिमा बैंक तथा वित्तीय संस्थाको नौ सय आधार बिन्दु (नौ प्रतिशत बिन्दु) ले आन्तरिक कर्जाको विस्तार भएको तथ्यांक राष्ट्र बैंकले प्रस्तुत गरेको छ । चैत मसान्तमा नै खराब कर्जा बढ्नुमा ब्याजदर वृद्धिको पनि आंशिक प्रभाव रहेको बैंकरहरूले बताएका छन् ।

बैंकहरूले थप कर्जा विस्तार गर्ने क्षमता गुमाएको (क्रेडिट क्रन्च) अवस्थामा पुराना कर्जाको ब्याजदर बढाइदिन थालेपछि खराब कर्जाको दर बढ्न थालेको एक बैंकरले बताए । बैंकहरूले कर्जायोग्य पैसा नभएको भन्दै पुराना कर्जाको पनि ब्याजदर धमाधम बढाएर झन्डै दोब्बर पारेका थिए । साढे ६ प्रतिशतको ब्याजदर एकैपटक १२ प्रतिशतसम्म पुर्‍याएपछि ऋणीले समयमै कर्जा भुक्तानी नगर्दा खराब कर्जाको दर बढ्न पुगेको बैंकरहरू बताउँछन् ।